كنّا زمان؛؛؛؛للشاعر::::محمد ابو العبادى

كنّا زمان
..........
زمان كُنّا ...
على الطبليه نتجمّع
ف وقت العصر نتغدا
وكان الجد والجده
بيحكولنا الحكاوي كتير
بذور الخير بدون موسم
بتطرح فينا بالقناطير
وكان الجار ف إيد الجار
وكنا عيال بنتلاقى
بنربط ع الشجر أحبال
ونتمرجح ونتشاقى
ونلعب لعبة العفاريت
وكان الدار ف حضن الغيط
نغمّي العين ونتدارى
وندخل عشّة الكتاكيت
يا واد حاسب تدوس البيض
ف أجري وأطلع النخله
وأنزل نلعب الحجله
ولاد وبنات
ما كانش نقول جيران لكن
نقول اخوات
بنجري نسابق الفراشات
ونرجع تاني نتسامر
ف صحن الدار
زمان كانت حياتنا عَمَار
وكانت أمي تجمعنا
وندخل حضنها الجنّه
وكنّا ساعات بنستنّى
عشان بتزغّط البطه
وبتنضف مكان الطير
وكانت قله جنب الزير
بنشرب شهد ف الميه
وكان حضن الجميع مفتوح
يساعي الكل وشويه
وكان فصل الشتا ييجي
بتشتي سمانا حنّيه
ف نشعر بالدفا زايد
بلمّتنا ف أحضان بعض
وطعم الشاي على الراكيه
مع حكايه يقولها الجد
وحشني زمان وأهل زمان
وعطر زمان ...
وحشني بجد
..............................
محمد ابو العبادى