(حسبة خارج العلامات ) الشااعر وحيد راغب

(حسبة خارج العلامات )
اطرح الفترة اللى فاتت 
من حاضرنا 
لو فاضلك فضل خبزة 
يبقى سيرنا 
مستقيم
والليالى رغم طولها
سيل نجوم
...
واللا حالتك بعتروها
ف الشوارع والرصيف
لو تنفض جوا جيبك
تتلقيه ملس ونضيف
...
الغلاف مابقاش لخامل
انت برَّا الجاذبية
روح وصيِّف جنب ترعة
البحار صرخت عصيَّة
الشماسى بدون كراسى
والرمال شافطة العطية
...
قلت جمع بلاش لقسمة
الغروب حط الملاية
الغصون شَبَطِت ف نسمة

كان مصيرها 
برق بيولَّع ف راية 
...
لسه باقى الضرب يمكن 
ينتعش سوقنا اللى مات 
عدَّى تعلب بص لينا 
وديله بِلْعَب بالصَّاجات
... 
ضرب ,قسمة , 
طرح , جمع ,
النخيل ما بقاش يسقَّط
غير دانات 
...
والرفوف ضجِّت حمولها 
ألف حلم عليه تراب 
والهوامش بان طلولها 
فاصلة , نقطة . بين قوسين 
واعتراض باشرح خراب 
صَفَّرِ النظرة الأمانى 
وانزل الأرض الحقيقة 
يكفى م الأوهام سراب
الشااعر وحيد راغب