إقرأ للمبدعة:::---زينب أبوالفتوح (بحبك يا بت )

إقرأ للمبدعة:::---زينب أبوالفتوح (بحبك يا بت )

بحبك يا بت 
ودايبه ف ترابك 
وداقه بقلبي
وقافله انت بابك
هاصبر عليكي
واحضر ف نفسي
لفرحة عنيكي
دا انا بس نفسي 
اطيب ف روحك
وابدر ف عمري
يزيد.فيكي ضيك
يا بت بحبك
يا مدياني مليون ألم 
ومرضعاني سرسوب نغم
وكاسره ف اديا أكم من قلم
باحب الرصيف الي وقعني هدر
واحب الغيطان اللي بتصلي شكر
واحب الحكومه ..معيشانه قهر
مأكلانه حنضل ومشربانه مر
باحبك وصابره و قاعده وساهره
أقول يا رب بلدي ليه بتبقي. جاحده
بتفرق ف خيرها وسايبه الغلابه
وحارسه اللي قادر ومدياله
والفقرا يحكوا بيوم كالو شبعوا 
وحدوته دايره ف بق الولاد
تفرقي ليه بين لولو وسعاد 
وليه الرواتب لناس بالشوال
وناس تانيه شاحته غموس العيال 
ياشيخه زهقت وقلب اتوجع 
بدادي ف روحك يمكن تهتدي
ويبقي طريقك دوغري وحلال
مش الباشا عايش وساند ضهره
بالمليار
واخوه اللي عايش جوا القبور 
مكتوب عليه ذل السؤال
ومدت إديه عشان العيال
وبرده باحبك وكاويني حبك
لكني باغير ...
لما باشوفك ع المدي سلطانة
ومعيشانه ذل واهانه
وانت الأميرة وغيرك خدم
عايزاكي ست الناس
وعقد لولي وماس
مش غنوه حزنانه
وشكوى مغروزه ف ضلوعنا
وحلم بالعدل يتقلب جبانه

زينب أبو الفتوح..السويس
٢٨/٧/٢٠١٦