ايوة بغير / للأديبة سمر علي

ايوة بغير 
بغير عليك يا بلادى 
يا مصر يا أمي
يا ام أبني و احفادى 
يا نبض قلبي أنا أفديكِ 
يا أرض الطهر و اجدادي
مين يا روحي يقدر يبكيكِ

حاسس بحزنك جوايا
صراخك مكتوم في غنايا
يا ست الكل يا بلدي
مال الآهه سكناك
زرعك ما بقاش علي لونك
اصفر خضارك
و زهرك مات علي عودك

حتى شمسك زعلانه
و قمرك في السما
بيعاتب ليلك
عوازلك يا غاليه حاسدينك
علي هرمك
علي نيلك

الكل طمعان
في ارضك بيحارب
و منهم حتى ولادك
إتحملتي كتير انا عارف
من ملامحك
من دموعك
من نبرة صوتك

و لساك صابره
و انا شايف
بس خايف بردان محتاجك
و كل ما ارمي نفسي
بين ضلوعك
ألاقي نفسي خارج اعتابك
و غيري جواك
حبيب بين احضانك

ما انا من حقي يا امي أغير
أزاى غير أبنك
هو اللي ليكِ يكون
و انا اللي منك
اعيش علي أرضك
غريب .......محروم

بس وحياتك لأفضل أد القول
لأفضل انا أبنك رغم الكون
و ح افضل أنا اللي ليك عاشق
و دايما عليك غيور

سمر علي