قالتلي عيد /// للمبدع محمد سعيد أبوالوفا***

قالتلي عيد 
مفهماشي 
فقلتها بحبك موت 
سوااا رايدة ماريداشي 
ومش هاراضي لحبي يموت 
ولا ينداس من الماشي

فردت بس من غير صوت
مفهماشي

فقلتلت الها
أنا منك ومن طينك
وذرة ضمن تكوينك
وعاشق رفرفة علمك
وعاشق ضمن عاشقينك

وانا يا حته من قلبي
كتبت ف عشقك القوانين
وعايز كل من عايش علي أرضك
يكون بالحياه راضيين
ومعنى الدولة يا بلدي
ماهش من رملة بس وطين
وزي ما طالبة وطنية
فخلي فيكي حس وعين
ماترميش الفقير عالطل
وعزك يبقا للتانيين

ماردتشي وحاسة بالخجل مني
عشان كاشف ملامحها
ومين شاري ومين باعها
وعشت ف قصرها العالي
ونمت ف طل شوارعها
بقيت م العالي للواطي
بقلب ليها مواجعها
وافتتح كل مواضيعا
وطال بينا الكلام عنها
ومين خانها
فخافت منه يسمعها
وقالت بس ماتكملش

انا لنزاعكم الملعون مابطمنش

سوا فيكم عيوب ولا
من الدم اللي راح ملا
مابقدرش احوش عنكم
ولاا بقدرش اتخلا

فقلتها كلامك زين
لكن ترضي يكون ده كبير
يقول لينا يانور العين
ويحفر فيكي قبر كبير
ويتنازل فيتغازل
بجد اصحي ده وضع خطير

قالتلي كنتو عاوزينه
وياما طالبتو يبقا كبير
متقلشي علي حدودي
ده ساب بسي تيران صنافير
وقال انه ماهوش راضي
يكون حقي ف أرض الغير
وانا فاهمة بكام باعني
وضيع مني معنى الخير

بقيت اضرب انا أخماس على اسداس
شبابك يا بلد ينداس
وتعملي حفلة للأنجاس
وترضي بس من غلبك
فيبقالهم كمان حراس

قالتلي بس ماتكملش
وتطلع مين

فرد لساني ولوحده
أنا يامصر دم وطين
انا المطحون ف اسعارك
وأشعارك
وفرق العملة من دمي
مايتحولش لدولارك
أنا الدعم اللي راح منك
لتجارك
انا المصري البسيط عاشقك
في كل كلامي بختارك
أنا نيلك وسد النهضة جزارك
انا الشارع أنا المرسى أنا دارك
انا الولد اللي صد الخوف
وناوي يبقا مشوارك
وانا الشجر متقطع
بمنشارك
أنا اللي يخونك انتي ف يوم
هاكونله ف حلقه مسمارك

عرفتني

فطلت ليا وابتسمت بشكل الخير 
وقالتلي ماتيجي نبدأ التغيير