ناصر(للشاعر المبدع ::: محمد ابو العبادى)

ناصر(للشاعر المبدع ::: محمد ابو العبادى)

ناصر
......
مشهد أول
كرباج على ضهر الفقير
وما فيش مع الكرابيج سماح
لكن خلاص
البدله كاكي والجميع 
كتفا سلاح
زهرة شباب النيل هنا
بيشدّوا م الليل الصباح
إرفع دماغك يا وطن
وبلاش تسلّم للجراح
إبنك جمال ويّا الرجال
من بعد ليل الإنكسار
رافعين أدان ع المأذنه
بيقولوا : حي على الفلاح
بيقولوا : حي على الكفاح
مشهد تاني
الأرض مش للأغنيا
والشعب مش حبّة عبيد
المُلك لله الصمد
والأرض خيرها لكل إيد
صوت الفقير اللي انكسر
دلوقتي بيرج الحديد
برد الغيطان أصبح دفا
مع طلعة الفجر الجديد
صوت العداله اللي اختفت
رجعت هنا
والشمس باست أرضنا
من نورها داب ..
جبل الجليد
مشهد تالت
صوت القنابل والمدافع
والبارود
صوت خلا كل الناس بقت
جيش ع الحدود
أرض القنال من بور سعيد 
لمّا السويس
أرض البطوله والرجوله 
والصمود
أمم قنالنا يا زعيم واحنا معاك
دا احنا الكرامه اللي ما يوم
تخشى الحشود
أمم قنالنا يازعيم واحنا معاك
وان مات شهيد ف المعركه
الصحرا رح تولد أسود
مشهد رابع
النكسه مش أخر المطاف
ولا عمرنا نعيش مهزومين
إرجع مكانك يا بطل
ويّاك بروحنا مكمّلين
يا نخلة النيل العظيم
يا بركه من راس الحسين
إرجع مكانك يا بطل
وامسح دموعك م العينين
لسّه الجنود ف المعركه
لسّه الزناد تحت الإيدين
إرجع عشان مصر الهرم
وعشان ولادها الطيبين
النكسه مش أخر المطاف
دي بداية النصر المبين
أخر مشهد
صوت السواقي صار بُكا
والنخل فوق الأرض مال
طعم المرار ف الحلق زاد
ونحيب ف أصوات الرجال
من كل حتّه نعش فات
وف كل بيت صورة جمال
مات الزعيم
مات البطل
مات اللي كان شايل جبل
وف صوته كان كل الأمال
مات الزعيم لكن أكيد
جوّه القلوب ..
عايش جمال
..........................
محمد ابو العبادى