هاميس _ شعر بقلم / إيزيس غانم ( شموس مصريه )

هاميس _ شعر بقلم / إيزيس غانم _ شموس مصريه

هاميس
************************
من ديوان (هلع الخوف)
**إيزيس غانم **

رغم إني بلمحك
في اليوم يا روحي ألف مرة
ولا غبت عني بين دقايق
يومي .. مره ..
النهاردة شفت
في عنيك المسرّة ..
وإفتكرت .. عيد اليسوع
لما شوفت .. ف شماله زعافة نخيل
ف غصونها دمعه !!
وف يمينه بالمحبة ..
كان قلبه شايل نور ف شمعة

لحظتها شوفتك ... رغم شوفي
اللى شايلك جوه منى
بين شغاف الروح والجفن
ومكاحل النني
جاي من جنة خلودك
فوق خدودك ..
بسمة بتزيح الغيوم
إقتكرتك يا حبيبي
وإنت قاعد جنب مني
لما كنت نديم حياتي .. وكنت
لحياتك نديم ..
إفتكرتك يا حبيبي .... وإفتكرت
يوم ضحكنا ف شم النسيم
إفتكرتك وإنت راجع ..
من حيضان جنة شهادتك
يا شهيد قلبي الوحيد .. !!
تاخد بإيدي .. وتقولي قومي
النهارده يا بت .. عيد
الموت... مفرقش اللى بينّا
وشهادتى كانت للوطن
كان غُسلي من نيلك .. ونخلك
يا مصر كان أجمل كفن
فمتحزنيش .. لأني لسه يا مصر
عايش ...
ولسه شايل ثورتك ...
على كتف شعبك .. على كتف جيشك
على كتف زرعك .. وخضار حشيشك
فاكسري يا مصر عيشك وإقسميه
على اللى لسه في أرض سينا
ودمه .. بيشاور عليه !!!
على الولاد السمر ..
على اللى لسه بيبتدوا ..
أول بداية عُمْر ...
لاكنهم رافضين يعيشوا
إلا لما .. يشوفوا نخلك
بلحه طارح .. بالولاد ... !!
يأكلوا تمره .. ويزرعوا بالنوا
أعياد ميلاد !!!!
مانتي الميلاد .. وإنتي الولاد
وإنتى يا مصر الأمومة ..
للإبن ... والأجداد
فاسلمي يا مصر وإبني ..
إبني ... إبني ... وإبن ... إبني !!
طول ما لسه .... يا بلدي
في عيونك نهار
والعنب بعروشه فارش
كل دار ....

تبقى قادرة يا مصر تاني
تسكّري ... طعم المرار
طول ما لسه بين ولادك
قلب مصري ... طعم مصري ... حب مصري
تبقى لسه هاميس ونيلك
مستني عُرسك ... مستني فرحك
مستني يقفل فتح جرحك

مستني موسى يحدف عصاه ..
تسعى ... وتبلع كل تعابين الطغاه
ويلف فوق شعرك هاميس
زينة الأعياد ... تحنّك
دم مصري
يا عروسة النيل يا ساكنه
جوه قلبي ... وجوه قلب
كل مصري

§§§§§§§§§§§§§§§§§§§§