شــهادة وفــــاة ::::بقلم / رمضان العلالقة

شــهادة وفــــاة 
^^^^^^^^^^
مش راح أنسى الأماني
و أفتكرلك ذكريات
الدقايق و الثواني 
و العقارب و الساعات 
يوم ما قولتي إنك ضحية
و إني تايه في الظلام
بس قلبي مش لغيرك
مش مغالطة أو كلام
مهما ضل و تاه مصيرك
و لا توهتي في الزحام
مش راح أنسى مرة إنك
قولتي هجرك غصب عنك
كان دا كله يبقى إيه ؟
و لما كنتي تسيئي 
ظنك ..... بالقاسية 
كان دا ليه ؟
أوعي تنسي في يوم حناني 
أوعي تنسي في يوم جناني 
و أفرحي باللي أنتي فيه
أخلعي قلبي و دوسيه
علميه أزاي يكش 
لجل يبقي بألف وش 
و يعيش حياته 
بس إيه ؟ 
تفتكري إنك ضحية ؟ 
هي دي بس القضية ؟ 
و إني أنسى ... 
مافتكرش ؟
أي ذكري عندي ليكي 
فيها عمري ... و نار شجوني
فيها دمعة من عيوني 
كنت فاكر يومها إني 
طير بغني ... ع الغصون
كنت بعشق الجنون 
أرضى و أشرب مر كاسك 
يوم ما قلتي إن ناسك
علموكي الكبرياء 
بس نسيوا يفهموكي
الاحتواء 
و الأكادة قلب مرمي
بينعشوه .... بس مات 
لما حبوا يلملموه ... راح فتات
استخرجولوا له الشهادة
فيها صورة قلب ميت
فيها مكتوب ألف آاااه
بس لسه الذكريات 
صخر صلب بين ضلوعي
و غصب عني مش بطوعي 
إني أنسى ...... مفتكرش
^^^^^^^^^^^^^^^^
بقلم / رمضان العلالقة