تلاكيك _ زين العابدين خضر

• 
  

تلاكيك  _ زين العابدين خضر

تلاكيك

وحياة قلبي لاقولهالك

ولو تغضب .. ولو ترضيك

وهاكتب تانى علشانك

كلام ينفع يكون تلاكيك

وهارضي بصدمتي تاني

من الكدب اللى بان لى عليك

وهاسمحلك تقرب لي

وتحكيلي وتشرحلي

وتفتح قلبك الفاضي

من الحب اللى كان ف إيديك

وتسرحبي فى أوهامك

وتحشرني في أحلامك

وتحط السم في كلامك

عشان افضل أموت ف عينيك

وحياة قلبي لاأتلكك

وانام واصحي وانا ف تلاكيك

واعيش واهم على الأخر

وأكدبلك ولو يرضيك

هصدق إنك المحبوب

وهستناك شروق وغروب

على باب الهوي المقلوب

وأشوفك أجري جري عليك

وحياة قلبي لاقولهالك

ولو تغضب .. ولو ترضيك

هاقول كل اللى يحلالي

كلام ينفع يكون تلاكيك

قصايد شعر ف شفايفك

ابيات موزونه ف رموشك

وهاعمل روحي مش شايفك

ساعة ما الكدب هيحوشك

وترفض ان تنطقها

بحبك كلمه منكوشه

بحبك كلمه مش سهله

ولاَ تنفع تكون تلاكيك

ولا تنفع تكون كدبه

ولا تقبل تعدي عليك

وحياة قلبي لاقولهالك

ولو تغضب .. ولو ترضيك

وهاكتب تانى علشانك

كلام ينفع يكون تلاكيك

( زين العابدين خضر )