مبقتش أنا // للشاعر محمود سمير ( شاعر المحروسه )

مبقتش أنا // للشاعر محمود سمير ( شاعر المحروسه )

قصيده : مبقتش أنا

أشعار : محمود سمير ( شاعر المحروسه )

لأ مش أنا

اللي زمان كانت معاگ ..

راضيه وساكته مِسلمه

لأ مش أنا

اللي ظلمت وسبت فيها ..

جِراح كتيره مِعلمه

لأ مش أنا

راحت خلاص أيام زمان

ماتت عروستك الخشب

وخلاص بقي

مَعَدش تاني هناك مكان

لجراح كتير من غير سبب

ما خلاص بقي

دلوقتي بَملُك مشنقه

واللي بييجي عليا مره

مش بيلحق ييجي تاني

ما أهو أصل قلبي ياما عانيَ ..

من الجراح

علشان كده ..

إخترت قلبي يعيش مرتاح

وأرمي ورايا كل شئ ..

عدي وراح

إخترت أمشي طريق الآقي ..

أنا فيه السعاده

ما أنا قلبي طيب يستحق ..

بإنه يتهني في حياته

مش كل يوم أشرب عليه ..

أنا قهوه ساده

والا تِجَرَح كل يوم في قلبي ..

وتدوسه ببياده

ما أهو أصل قلبي مش تراب ..

والا حَجَر

ده قلب غالي ومش هيرخص ..

مهما دارت بيه الحياه

والا إتظلم يوم م القدر

ما أنا مش راح أسمح أشوفه تاني ..

بيبكي قدام عيني دَم

عليه إيه يا عَم ؟

ما الأفضل إني أصونه وأحفظ كبريائه ..

وكبريائي

علشان كده ..

نَصبت حبل المَشنقه

ما خلاص بقي ..

ما خلاص بقي ..

مبقتش أنا