الزمزميه بتبتسم / للشاعر محمد ابو العبادى

الزمزميه بتبتسم / للشاعر محمد ابو العبادى 

الزمزميه بتبتسم

....................

كان الولد ...

يشبه سنابل قمح

بادئه ف الخَضَار

يسهر مع نجوم السما

والصبح بيبوس النهار

واكمنه بالطيبه اتعجن

كان قلبه مليان بالعمار

وعشان حبيبته الطيبه

حالف يكون ..

ع الجبهه يحميها العدا

لو قرّبوا

ح يصب فوق راسهم دمار

كان الولد جنّة نعيم

لكن على اللي يعادي نار

قام الولد ...

باس رجل أمه وإيد أبوه

باس النخيل

باس الشجر

باس التراب

وبطعم إحساس الشباب

راح ع الحدود

كان دق قلبه ف الضلوع

واحده لسلام

والتانيه برميل البارود

ما يهمهوش بالروح يجود

لجل الحبيبه الطيّبه

كان عز بردُه يقول دفا

كان عز حرُّه يقول نسيم

كان الولد فعلا أسد

ما يخافش أبدا م الجحيم

البدله كاكي معطّره

وسلاحه ف دراعه اليمين

والزمزميه بتبتسم

لو باسها بعد صيام يومين

وقت الفطار مات الولد

وياريته مات ف المعركه

دا مات بإيد متأسلمين

نام يا ضنايا ف التراب

إحنا اللي أموات بالحياه

وانت أكيد

ح تعيش سنين

....................

محمد ابو العبادى 

من ديوانى شهقة وطن