عادى جدا - بقلم / زين العابدين خضر

عادى جدا ..
لما بتلقي اللى انت عشقته بيهرب منك
سايب جوا مرايته الهشه
كل كلام الذكرى الجارحه 
وبيختمها بنفس الكدبه .. إنك كداب
لما بتلمح جوا قصايدك بيت مدبوح
شعر بدم القلب البارد 
لما كتبته ماكنتش تعرف إن الحب سلاح قتال
وانك بعد عذاب الحب ونار البوح
بعد سنين حيكون لقصايدك قلب وروح
عادى جدا ..
لما بتنسي وتفتح قلبك لحظة ضعفك
لما الصدق يخلي ببان البوح من غير بواب
وانت ف ليل الغش برئ .. 
نازل حب وطالع حب وكاتب شعرك كله فصيح
عارف إن القلب ساعات بيغشك
والإحساس الخايب خاب
هي مشاعرك .. وانت الأصل وإنت الصوره
وانت العاشق اللى ساعات طيبتك وظنونك
بتخدك منك تظلم فيك وتجرح فيك
لما بتلقي اللى انت عشقته بيهرب منك
سايب جوا مرايته الهشه
كل كلام الذكرى الجارحه 
وبيختمها بنفس الكدبه .. إنك كداب
عادي جدا ..
لما بتسمع كل اهانتك من أحبابك 
لما بيشتم فيك ف غيابك 
كل الناس اللى انت عارفهم
لما البحر اللى انت هاويته يغرق فيك
لما القلب اللى انت سكنته يضيق ف عنيك
تقرا كلامك بالمقلوب ..
تمشي ف سكة شوك مسحوب
تمسك إيدك نار الفرقة وقت غروب
تضحك تبكي وتفرح تنعي وتصبح تلقي الليل مكتوب
بعد القرب وبعد الحب بترمي همومك ع الأغراب
لما بتلقي اللى انت عشقته بيهرب منك
سايب جوا مرايته الهشه
كل كلام الذكرى الجارحه 
وبيختمها بنفس الكدبه .. إنك كداب