جريدة أحلام الناس_حطـة يابطــة_ زجل بقلم/ بهاء الدين بدوى

حطـة يابطــة ..
~*~*~*~*~
الست أم بطة
لبست أبو أوية
وربطت الأمطة
كانت إدارجية
ولكل شيء ظابطة
تكنس وتمسح وتطبخ
ونضيفة زي الإشطة
وفي الغسيل والكي
مالهاش مثيل ولازي
وست بيت كما يجب
وأروبـة ومتحاوطة
وتحب جوزها صحيح
وبحبـه مرتبطة
وبعلها سي اسماعين
راجل ويملى العين
والناس ينادوا له
يقولوا له يابو بطة
رجع في يوم البيت
والمزاج عالي
كانت العيال نايمة
والأمور ظابطة
راح لأم بطة يوميها
وكان عاوز أطـة
كانت ياعيني تعبانـة
وعندها ..... زُغُطة ..
قالت له عيب اختشي
روح نام واتغطــى ..
لُسطى اسماعين
إتحلق له ..
حلقت له زلابطة
ومشي يكلم نفسه
وأموره مش ظابطة
نفسيته تعبت
والنفس ترابـوطة
راح للطبيب يوصف له
للعلاج خـُطة
نصحه يروح يتــجوز
واحدة تكون إشطة
وبشرط فرفوشة
وماعندهاش أمطــة
صاحبنا قال ياسلام
ع البركة يا الدكتور
وتاني يوم إتجوز
مـُزة من طنطــا
مراته شمت خبر
لطمت على صداغها
والقلب قايد نار
فلفل على شطة
وحضّرت شياطينها
يفتوا لها في دي الورطة
قالت ورحمة أمي
لاأدبح لك القطة
كادت وكيد النسا
من هنا لمالطـــة
كان قلبها موجوع
كأن فيه جلطة
رجع اسماعين البيت
يجهز الشنطـة
راحت له متزوأة
وفكت الأمطـــة
وقالت له رايح فين
يابعلي يابو بطة
رد اسماعين
قال لها :
مشوار كده
في سنطا
قالت بألف سلامة
ياواطي يابيئة هابطـة
ومن ورا ضهره
وهوباااا .. راحت نطة
قسمت دماغه نصين
فلقتها بالبالطة
فشت غليلها الولية
ودي كانت الغلطة
ياعيني ع النسوان
لما تكون متعابطة
ودي آخرة أبو أويـة
وربطة الأمطة
ورحمة الله عليك
ياسُـمعة يابو بطة
~*~*~*~*~*~*~