وحشتيني_ شعر بقلم / ريم صلاح

وحشتيني
.........
لسه بقوم ..
أتوضا بصورتك
لسه ليلاتي بلفّ ف أوضتك
أحضن كام فستان ف دولابك
وانا شمّه ف فساتينك ريحتك
لسه بشوفك نونو بتحبي
طفله بهزهزلك مُرجحتك
لسه يانور العين يا ضنايا
شايفه خيالك قُدّام منّي
وانا بفتح أحضاني واضمك
إيد بتطبطب
إيد بتحاجي
وكفوفي بتعدل تسريحتك
ياااه يا ضنايا
هونت عليكي تغيبي دا كله؟
هونت عليكي تروحي لوحدك؟
دنا قاعده فوق طرف سريرك
ماسكه لحافك وبغطّيكي
دنا واخده الفستان ( الأبيض )
بين أحضان قلبي بدفّيكي
والدق اللي ف قلبي بيطلع
كل دقيقة يبُص عليكي
هنا شراباتك
هنا مكياجك
هنا برفانك
هنا ع الرف كتاب بيحبك
كان دايما نومته ف أحضانك
هنا قلبي العايش علشانك
بقى ميّت .. لما فارقتيني
يااااه يا ضنايا
يااااه يا حشايا
لسّه بقولك من جوايا
واللهِ يا بنتي .. 
وحشتيني
............................
من ديوان
العزف الحزين
ريـــــــــــــــ صلاح ــــــــــــــــم