( معتقل جوّه الحياه ) للشاعرة إيزيس غانم .
السلام عليكم ورحمة الله تعالى وبركاته
( معتقل جوّه الحياه ) للشاعرة إيزيس غانم . |
قصيدة ( معتقل جوّه الحياه )..
من ديوانى الثانى ..
** ** ** ** ** ** **
مُعتقِل جوّه الحياه...
تمّ إعتقالى ...
من يوم مسابت أمى حبلى للدايات..
من يوم مطلعوا هنوا أبويه...
والدايه زغرد حسّها وقالتله ..هات..!!
جالك ولد..يتربى فى عزّك...خاويه..
لحظة ميأذن ربنا وتجيب بنات ..
الدايه قالت ..وإنتهى الأمر لسكات ..
ودخلت معتقل الحياه..
بين سنين العمر ..
طوبه طوبه ..أعلّى ذكرى الذكريات ..
وكأنى سقّا...بسقى يومى الجىّ..
بعد اللى قبله مامات..!!
هى كده رؤيا حياتنا ..تبتدى بالفرح..
تمشى بالوجع ويّا الساعات ..!!!
مُعتقِل جوّه الحياه..والحياه..
عمر دايما يبتدى رغم الوجع ..
رغم الآهات...!!
وكأننا عمال بنبنى ف عمرنا ...
علشان نسيب ف العمر أحلى الذكريات ..
كام عمر عدا...!؟
كام عمر فات ..!؟
واللى لسه مامتش عايش
جوّه عمره حىّ ميّت ...!!
جوّه منه خير ...وشر...
وإن خرج من سجن عمره...
ساعتها بس ..هيبقى حر ..!!
ـــــــــــــــــــــــــــــــــــــــــــــــــــــــــــ
إيزيس غانم ..
من ديوان \ التشكيل من خلال إمرأه..
نسخ الرابط | |
نسخ للمواقع |