محمد ابو العبادى - يكتب / فوق يا غشيم

محمد ابو العبادى - يكتب / فوق يا غشيم

فــــــــــــــوق يا غشـــــــــــيم

......................................................

لسة بتسمع تانى كلامهم

لسة مصدق ..

واضح انك لسة غشيم

دى الجنة اللى عاملها امامهم

لما تقرب منها ح تلقى

جوفها بيحدف نار وجحيم

فوق يا غشيم

فوق م الغفلة

قبل ما يجى اليوم وتلاقى

رجلك غرزت جوة الوحلة

دول عاملينك زى النحلة

تلسع غيرك

تقتل غيرك

تحرق غيرك

بس الاخر يبقى مصيرك

عبد لكل خسيس ولئيم

فوق ياغشيم

مش بازازة زيت او سكر

تحرق وطنك

تمسح عقلك م التفكير

مش بازازة زيت او سكر

تصبح ديل او ضل حقير

أنا زيك نفسى ف تغير

انما مش تغير ف الدين

أنا دينى الاسلام وسماحته

عمره ما كان دين الشياطين

أنما دول دينهم فى هواهم

وما يطلبه المستمعين

احذر من تجار الدين

واوعى تدافع عنهم ابدا

أو تتحول لعبة ف أيدهم

أمك حرة وطنك حر

فمتبقاش من ضمن عبيدهم

واوعى وعود الزيف النايم

جوة كلام وحروف مرشدهم

اوعى تبيع دمك بالساهل

او دم خواتك برخيص

حاذر من سكة ابليس

والحق نفسك

الحق اهلك

الحق وطنك

الحق كل الفاضل منك

لسة طريق الخير مفتوحلك

لسة ف وطنك احلا نعيم

فوق يا غشيم

محمد ابو العبادى

من ديوان شهقة وطن