أصل المصري / للشاعر محمد ابوالعبادى
السلام عليكم ورحمة الله تعالى وبركاته
 |
أصل المصري / للشاعر محمد ابوالعبادى |
أصل المصري
.................
أصل المصري بجد حكايه
يتعب يشقى يضحك يبكي
بيعبّي الهم ف كوبايه
لكن عمره ما فكّر يحكي
تبقى دموعه كاسات وكاسات
لكن جوّه ضلوعه تبات
ولا تظهر ف عينيه دمعات
ولا حتى من الهم بيشكي
المصري دا فعلا حدّوته
ما بيركعش لغير الله
وقت الشمس ف ضل التوته
بيقيّل والدنيا وراه
وملايكه من السما حُرّاسه
ماهو نايم ف الغيط مع فاسه
والخير اللي لأهله وناسه
أطعم م الشهد يا محلاه
المصري اللي ف قبلي وبحري
الواخد شكله من النيل
واد مجدع وخلاصه ودوغري
بطبيعته ومن غير تمثيل
قاري تاريخه وحافظ دينه
جد ما فيش ولا غلطه تدينه
بيخمّس ف عيون حاسدينه
وبيقرا كتاب التنزيل
..............................
ابو العبادى
من ديوانى شهقة وطن
| نسخ الرابط | |
| نسخ للمواقع |
0 التعليقات
