أنا الأ ديب / بقلم *سيد صميده*

أنا الأ ديب
ف الأرض جنى بقدم
ماشى رقيب حالى
خد من رفاتى وردم
وراح بنى العالى
باعنى برخيص التمن
وكنت انا الغالى
أنا الأديب اللى راس ماله دموع وسجون
أنا الأديب اللى قالوا عليه مجنون
أنا الاديب اللى سكن عشش وقبور
أفوت ع النيل يتكهرب
يشع منه النور
أفوت ع الشوك يتقلب لزهور
أكتب كلام للحب والتفاريح
يبسط فقارى البلد 
يداوى ف المجاريح
صوتى كما الرعد
ماتهزه يوم الريح
لكن فقير وعليل وبلدى نسيانى
أنا الوليد اللى رطن
منكر ف قلب الوطن
ماشى وحافى القدم
هلاهيل تعرى البدن
قلبى مسكون ب الألم
قلبى مسكون ب الأنين
أيام مليانه بشجن
وأقدام تدوس ع المخلصين
مكوى من هجر الوطن
محروم من نظرة حنين
مشطور ف حلمى ليل نهار
مسكون جوه الانتظار
والأسم أدباتى \ رفيق القلم
سيد صميده