؛؛ الأسئـلــــه ؛؛ ديوان عبير المصراويه (بقلم) الدكتورة : عبير الجندى .

؛؛ الأسئـلــــه ؛؛
ديوان عبير المصراويه 
؛؛؛؛؛؛؛؛؛؛؛؛؛؛؛؛؛؛؛؛؛
-: فين حصانك ؟ 
-: مات حصانى
-: واندفن ؟ 
-: جوايا قبرُه
-: طب عشانك 
-: ما تقوليش أبدا عشانى
-: يا حبيبى 
-: لأه .. مش دلوقتى .. بحرى اتهز برُه
-: الطريق ضاغط علىّ 
-: يا حبيبتى
وبرده أصبح .. قاسى برضه زى حَرُه
-: طب ناقشنى 
-: المناقشه دراع هوا أزرق ناكشنى
والملل وقع على أوراقى حبرُه
-: يا حبيبى الصبر 
-: لأه .. إنتهيتوازاى حايفضل
.. بعد موت القلب صبرُه
-: إنت مش فاهم عواطفى
-: وانتى مش فاهمه عواطفك
-: طب أجيلك إمتى ؟
-: مش عايزك تجيلى 
-: أوضتى مش محتاجه عطفك
-: يا حبيبى 
-: شرشرات الشك حاميه
-: طب تعالى نمشى حبه
-: الدروب مكشوفه عاميه
-: والعمل ؟
-: أنا نفسى تايه .. مش طبيعى
-: دبلتى لسه فى صباعك 
-: إعتزاز بالماضى يمكن
أو عشان صبحت بطول المده
جزء عزيز وغالى من صباعى
-: مش هاتكتب عنى حاجه 
-: القلم أصبح تقيل .. تقل الحجاره
-: يا حبيبى .. خايفه .. خايفه عليك
-: حبيبتى .. إنتى خوف فوق مدخن ع السيجاره
-: يعنى قصدك .. إنى فى الآخر هادوسك ؟
-: إنتى دوستى 
-: يا حبيبى بلاش شراسه
-: إنتى من أسباب شراستى
-: طب هاعود لك 
-: صوره طبق الأصل م الطفله القديمه
-: مش بإيدى 
-: إنتى فى برواز شكوك فاضى انحبستى
-: إنت ظالم 
-: وانتى ظالمه
-: إنت مش عالم بحالتى
-: قصتك منقوشه فىّ كلمه كلمه
-: عود لأمك .. يا حبيبى .. عود لأمك
-: إنصرف تمن التذاكر
-: عود لىّ ماشى .. عود لى ماشى
-: الطريق زى القدم مليان محاجر
-: شئ غريب يا حبيبى يأسك
-: يأس طفل ما شافش إسمه
فى قايمة الناجحين 
وكان شاطر 
وليل ونهار مذاكر 
-: المدينه فى انتظارك .. والحبيبه
-: هاجى ليكوا .. استنظرونى
لو أنا .. ودا شئ محال بعت المبادئ
وانطفيت .. وصبحت تاجر
؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛
عبير الجندى .
 عبير المصراويه