(وااااه يا دمعة مصر) _ بقلم / سيد صميده

(وااااه يا دمعة مصر) _ بقلم سيد صميده

(وااااه يا دمعة مصر)
كل حدودك ليه دمع ودم
كل قصورك متلونه بالهم
كل الطرق مزروعه بالشهدا
واحنا ف جنازه صويتها ما يتلم
حتى كفوف الورد فى البساتين
صابها الندا لكن ملاها الدم
لون السما احمر
حتى القمر اسمر
كل نجوم السما لبست حداد م الهم
يا عود على الشط محنى من رياح القهر
سكنت فصل الخريف اما رماك الغدر
والغدر كشرنيبانه على السكه
خطف الخريف مالربيع البسمه والضحكه
اما خطف زهرنا وموت الضحكه
غربان بتنهش فى عشوش خضره
بتفتل الزهره فى قلوب طاهره
تدمع عيون السما تحزن الصحرا
اما كبش قلبنا غدر الجبان فى الليل
سرق فى ليل حلمنا وسقانا كاس الويل
شرد فرح عمرنا وتهنا ف مسانا
طلع النهار الحزين بيئن فى دمانا
فرد الحبان على وشنا عباية الموت
لا شفنا ضى السما وسكنا قهر الموت
يا بهيه مدى الصوت وازعقى بقوه
فات الشهيد من هنا ولا ماهوش هوا
ولا دا نعش القلوب اللى قهرها الغدر
ولا دا صوت الحزن ساكن اذان الفجر
ولا دا دمع السما ولونه لون الدم
ولا دا حزن اترسم فى السكه وماشى
ينده على قلبنا والقبر ما كفاشى
يحضن نجوم عمرنا واحنا ماندراشى
سكنوا الرفاقه الطريق والجسد بيئن
بيشكى من غدر واخد عمرنا وماشى
بيفرق الموت على الجهتين
لمى دموعك يا امى لميها
خلى العيون فيها ما فيها
وغسلينى يا امى بدمعك غسل
تصعد به روحى للسما وهو حاضن البسم
اللى ف شفايفك ساعة التوديع
اما وقفتى على بابنا وقلتى سلام
هاتعود يا ولدى وضحكتك قدام
تنور السكه وانا بنتظر نورك
تدخل عليا بشنطتك وافرولك
اشم ريحة الوطن فى عرق كفك
احضن رمال الحدود اللى فى لبسك
اسمع اغانى الوطن فى خطوتك فى الحى
واهيم بحضنك وانا بجرى عليك اخدك
اضم قلبى فى قلبى وعالجبين بوسه
انا مش ببوس الولد انا بهدى البوسه
للحلوه ام النيل وام الهرم والغيط
وامد بالصوت زغروده لاحلا محروسه
رفيق القلم
سيد صميده