رغيف العيش _ شعر بقلم / محمد أبو العبادي

رغيف العيش 
...........................
رغيف العيش
صبح فى زمانا بالتيلة
وبالشدة
ساعات حتى يكون بالدم
رغيف العيش
صبح حلم الفقير اللى
مقضى العمر فى رحاية
مابين العوز وبين الهم
سلامى للرغيف ياعم
وسيبنى اجوع لحد ما اموت
م انا العايش فى ساقية بدور
وانا النايم فى قلب تابوت
وانا الطيب
وانا المسكين
وانا الهلفوت
وانا اللى بلحمى بتمزوا
وانا اللى بتاخدوا من عرقه
وتبنو بيوت
وتبنو قصور
انا الحق اللى دستو ا عليه
عشان صوته بيقف فى الزور
وانا المحشور فى قلب طابور
مداه يوصل لسور الصين
انا الطير اللى انام مجروح
ودمه مغرق الجناحين
عشان وانتوا هنا قاعدين
نتفتوا من جناحه الريش
انا اللى بتاخدو من لحمه
وترموله الفتات بقشيش
وانا النايم فى بحر ديون
وانا العاجن وانا المعجون
وانا الشقيان بطول اليوم
عشان اقدر اجيب العيش
ولما با جيب يدوب رغيفين
ما بيكفوش لجوع ابنى
ف يبقى ازاى وانا محنى
ح اشيل راية بلادى لفوق
ويبقى ازاى وانا المشنوق
ح اقول تحيا
مادام لسة الجراح صاحية
رح افضل كل ساعة فى هم
سلامى للرغيف يا عم
من ديوانى شهقة وطن
ابو العبادى