صوره ف الوجدان.. هدي غريب

صوره ف الوجدان..
ساعات باسرح وباتأمل
ف صوره ساكنه جوايا
وياحكي ليها واتكلم
كأني باحكي ويايا
والاقيها بتسمعني
وانا باشكي اللي واجعني
تطبطب هي علي قلبي
وتمسح ليا دمعايا
تلملم اللي راح مني
بلمسه شوق وحنيه
والاقيها بتفرح لي
وتدعي ع اللي يجرحني
تمد ايديها تحضني
وامد ايديا واحضنها
الاقيني حضنت سراب
واتاريني انا باحلم
وحلمي كمان طلع كداب
خيال حسيته يوم جنبي
ده وهم وعشته من قلبي
وكان ف حياتي امنيه
ولما فوقت من حلمي
جريت بصيت علي مرايتي
لقيت الصوره اياها
ف صورتي ولسه شايفاها
عرفت ان انت ساعتها
سكنت روحي وكياني
وان الصوره دي صورتك
وعايشه جوه وجداني
وانك مهما كنت بعيد
معايا ف كل احلامي
 هدي غريب