حد السيف / بقلم / مصطفى المحمدى

بقلم / مصطفى المحمدى

حد السيف
لو جه على رقبه ضعيف
هيحسه طوق نجاه خفيف
اكيد بالنسباله النجاه
لأنه مخنوق من الحياه
أصل الذهب مهما لمع
 ميبنش فى عيون الكفيف

اه ضعيف
وبموت من الخوف الف مره
والغربه مره
طاحونه ممكن
وساقيه جايز
وساعات نموت
 بس بتلاقى الرغيف

همك رغيف
ممكن تلاقيه على الرصيف
وممكن انك تسرقه
وممكن تشوف طابور طويل
وناس حوش بتفرقه
لو جيت فى يوم
بعت المبادئ
ونسيت أنك انسان شريف
انسا الطابور
 وسهل ترجع بالرغيف

لو جيت فى يوم بعت المبادئ
هتشوف حاجات اتغيرت
بسمه مرسومه فى وشوش
ايادى تتمد بسلام
وحمام سلام
بس جواهم اسووود
لو يوم وقعت
هتشهل غلط لناس كتير
 وأمضا صح اتزورت

يا ما بيوت طلعت لفوق
من الغلط
 وجالها يوم واتدمرت