وبشهد لك / بقلمى __محمد مغاورى
السلام عليكم ورحمة الله تعالى وبركاته
وبشهد لك / بقلمى __محمد مغاورى |
من ديوانى فى العاميه
قصيده بعنوان ((غروب))
بقلمى __محمد مغاورى
_______________________
وبشهد لك
بأن فى سرك الباتع
كلام رائع ..
بيلهمنى ..ويرسمنى
ويرسم لى ..طريق واحد
طريق رايح ومش راجع
وفيه سامع لصوت تانى
بيسقى الوجد وجدانى وعرفانى
وبلقانى ..مابين الرمش والننى
يكلمنى سؤال حيران
ويسألنى
عن الحرمان ....عن الاحزان ...وليه راحت تفاسيرى
توضح كل تقصيرى
وتنده فى الهوى غيرى
وانا المستنى تغييرى مابين لحظه
وبين عمرى اللى كان راسم تصاويرى
كما البهتان فى ليل حيران
بيتسند على كلمه تكون
بلسم فى تعبيرى.
.............................
ويسألنى صباح العشق فى عيونك
عن العنوان
فبتحير ..وبتغير
وبتخير اجاباتى مابين الماضى والآتى
وتتسرب حكاياتى على خدك .
على ردك فى ناياتى
فبسمعها وارجّعها طريق موجود مالوهش حدود
وانا موجود على حدّى
وانا بدّى أكون مشهود
وليا وجود بوجدانك
فبستنى بساط الريح..يعدينى
يخلينى كما البركان
دا ليا زمان من الحرمان مفهمنى
بأن الشمس لو مرت على أرضى
أكيد هتموت
ويصحى الصوت ..ويخنقنى
فبتحول جرس رنان
بيتردد كما الحيران على الكتمان وعنوانى
فبلقانى سكنت اللهفه جوايا
وفى مرايا ماليها وجود ..انا موجود
ببان عريان ..ومتغطى بقلب كبير على جسمى
وانا رسمى يادوب إنسان
وكان همّه أتوه منه فى حرمانى
ويوم تانى فى يوم جانى
وابتدى يحلم
لقيت الحلم فى عنيك كما الاشواك
بتجرحها فبتدمّع
وانا برجع
وبشهد لك ..بأن فى سرك الباتع
أنا عايش..أنا ضايع
أنا راجع شعور إنسان
______________________
نسخ الرابط | |
نسخ للمواقع |