عمرك كام ؟ لأميرة الإبداع ( ريم صلاح ) من ديوان دم البراءة

عمرك كام ؟ لأميرة الإبداع ( ريم صلاح ) 

من ديوان

دم البراءة

الذي تم اعتماده بهيئة قصور الثقافة وسيطبع قريبا 

وسيكون بالاسواق وجميع المحافظات

.

.

.

عمرك كام ؟

............

إياك تسأل حد بيعشق

عن عمره وتطلب تحديد

اللي بيسأل حد بيعشق

يبقى سؤاله بجد بليد

يبقى كأنه ف طوبه بينزل

يغسل وشُّه ف بحر جليد

أو قاعد عريان ف العيد

رغم العيد جي ف أمشير

يبقى بيعمل زي الدبه

لو يوم وقعت جوّه البير

وان صح كمان التعبير

يبقى غشيم والكل يدينه

عمر القلب ماهوش بايامه

ولا بشهوره

ولا بسنينه

عمر القلب حسابه دا غير

أي حساب الناس عارفينه

ما بيتعدّش ولا بثواني

ولا بدقايق 

ولا بساعات

عمر القلب حسابه بيبقى

دايما بحساب الدقّات

والدقّ اللي بيبكي بيبقى

غير طبعا دق الضحكات

دا حساب غير كل الحسابات

مليون دقّة فرح .. بثانيه

دقّة حزن .. بسنه أو أكتر

أصل الفرح يخلّي الدنيا

طعمها زي الشهد مسكّر

أما الحزن طبيبعته بيبقى

زي نبات صبّار متمرر

وساعات يمكن أكتر واكتر

واللي يحاول مرّه يفكر

يسأل قلبي عمرك كام

مش رح يفهم أبدا حاجه

وان ردّيت تلاقيه يتعفرت

ويحس ان ف ردّي سذاجه

أصل انا قلبي قصّه كبيره

محتاجه لتفسير وديباجه

وقت بيبقى جنين مش أكتر

يمكن أصغر

وقت بيبقى يادوب ف اللفه

أو زي النونو اللي بيحبي

وقت بيبقى عجوز متسنّد

على عُكّازه بضهره المحني

وقت عيون الناس تلمحني

طايره ف كون فارده الجناحين

وقت تشوفني خيال دبلانه

وتشوف نهر دموع ف العين

وقت فراشه ف قلب جنينه

تتنقّل بين شجر الورد

وقت ف قلب الضل حزينه

تشبه مولد فجأه انفض

وقت باكون الجزر ف موجه

وقت باكون للموجه المد

وان كان ع الأيام والعد

يوم ف الطالع

يوم ف الضد

وده حالي بطول الأيام

يبقى طبيعي ما حدش يعرف

يسأل قلبي ..

عمرك كام

..........................................