(مش غريبه) بقلمى - احمد خضر

(مش غريبه) بقلمى - احمد خضر

(عامية) من ديوانى (صرخات قلم) بعنوان:-

-----------------------------------------(مش غريبه)

مُش غَرِيبه إنك تلاقِى 

أو تقابل حد بوشِّين

ياخْدَك فِ حُضْنُه ويطَبْطَبَك

ومن وراك يِسِنِّلَك سِكِّين

ومش غريبه على الحاقدين

فى المُقَابْلَه الله عليهُم

مرسومِين ........ متْبَسِّمِين

مزيَّنِين قُصُورِ الشَّرَف

بس للأسَف جُوَّاها شياطين

واللَّا المنافقين اللِى عايْشِين

على دم الغلابه والمساكين

موجودين ومنتشرين 

فى كل مكان 

واتْخَنَقْنا يامسلمين

توب الكرامه عليهم بيلْمَع

وياما هتِسْمَع كلامهُم زِين

ناس بتسْرَق وناس بتنهب

والغلْبَانين تحت الرِّجْلِين

والحراميه عايشين حياتهم

والمخلصين الطيبين متشردين

والأعادى حوالينا صامدين

مستنيين ........... ومنتظرين

مين اللِّى هيبيع شرفُه

ومين اللِّى هَيَاكُل مين

ومش غريبه الأسره تِضِيع

والأب والأم فى العسل نايمين

البنت قاعده قُدَّام المرايه

والواد فى الشارع بيسب الدين

وخلاص حياتنا اتلخبطِت

واتشقلِبِت وبقينا تايهين

غارقانين.......... وتعبانين 

ومش عارفين الصالح من الشِّين

متأخْذُنِيش فى اللِّى بقولُه

أو بَكْتِبُه............

دا لسانى وقلمى مغصوبين

لأنِّى واحد بيحب أهلُه

ودا حال كل المؤمنين

ودِى حياتنا ولازم أوصفها

يمكن تفوقوا يا بنى آدمين

سكوتكم يخلى الحجر ينطق

وفعلا هيشهد على الظالمين

ياأهل الأمانه والكرم والدين

بالله عليكم...... أروح فين

لما المنكر صبح معروفنا

والمعروف بقى شيئ مُشِين

وبقيت خايف لبكره إمامنا

يهرب من المسجد ويسيبنا واقفين

ولما نسأله يقوم يجاوبنا

هوَّ انتوا ناسيين فويل للمصلين؟

وتكون دى آخر الحكايه

وبئس النهايه

إلا من رحم رب العالمين

‫#‏مسجَّلَه_حقوق_النشر_محفوظه‬

-------------------------------------------------(‫#‏بقلمى‬)

‫#‏الشاعراحمدخضر‬