حساب جديد // للمبدعة ريـــــــــــــــــ صلاح ــــــــــــــــــم
السلام عليكم ورحمة الله تعالى وبركاته
 |
حساب جديد // للمبدعة ريـــــــــــــــــ صلاح ــــــــــــــــــم |
حساب جديد
...............
مش ناكره حُبّي لك
ولا شوقي لمّا تغيب
لكن حسابك تقل
من زحمة الألاعيب
كدبك جراح ف الروح
باداويها بالتنهيد
تبعتلي جرح جديد
قبل القديم ما يطيب !
ياللي انت ليّا حبيب
جرحك ف كل مكان
والحزن جوّه الروح
ناشع على الجدران
وان قولت احاسبك يوم
كشف الحساب مليان
قلبك طبيعته جبان
وانا قلبي نسمة شوق
إزاي أكونلك هنا
وعذابي زي الطوق
على عيني بات ملفوف
مانع بصيص النظر
وانا شمعه تحت المطر
إزاي ح ييجي الضوء
طول م الوفا مشنوق
صعب الغرام يكمل
ورد الربيع لو مل
عز الربيع يدبل
والحب لو يختل
اليأس يصبح غول
وتلاقي باب الأمل
طول الزمن مقفول
والجرح يصبح جراح
مالهاش علاج ف الأرض
واللي اتبنى أحلام
من غير كلام يتهد
ف ان كان غرامك جد
إحلف ما تكدب يوم
وانا ح انسى إي هموم
ح اقفل حساب الوجع
والحزن والتنهيد
وافتح معاك م اليوم
يا حبيبي ..
كشف جديد
.......................................
من ديوان
دم البراءة
ريـــــــــــــــــ صلاح ــــــــــــــــــم
| نسخ الرابط | |
| نسخ للمواقع |
0 التعليقات
