صرخة وجع // للمبدعة ريم صلاح

صرخة وجع // للمبدعة ريم صلاح

صرخة وجع

...............

حجم الوجع ..

يشبه لحجم الديناصور

بيطير كما العنقاء لفوق

ويعود ف جوفه النار تفور

ف يبُخّها حمم الجحيم

شكل الوجع شيطان رجيم

بيضِل قلبي اللي اهتدى

ويمد إيده يدحرجُه

من فوق صراطه المستقيم

طبع الوجع دايما لئيم

لو غاب يغيب دايما عشان

سافر ف دهاليز الزمان

ويعود من الماضي اللي كان

وف إيده ألف وجع قديم

أستغفر الله العظيم

لو كنت قولت الأه بصوت

أصل الوجع كان زي موت

بيشد روحي من الجسد

حسّيتني تحت المقصله

متكتّفه وممدوده مد

أصل الوجع يقدر يهد

اكبر جبل لو كان فولاذ

وانا كنت أضعف م الإزاز

يبقى المحال ح اتحمّله

د انا كنت لسّه ف أوّله

ولقيتني باصرخ ألف أه

ولقيتني إحساس العذاب

جوّايا أكتر من مداه

وصبحت حسّه كأن شئ

بيشد من عمري الحياه

ف ازاي رح اوصل منتهاه

من غير ما يطلع منّي صوت

ولا حتى ترنيمة أنين

يا كل كل الموجوعين

الصرخه مش أبدا حرام

ومدام شعور الإنهزام

جواكوا من كُتر الوجع

يبقى اصرخوا

.....................................