خط احمر / للمبدعة (ريــــــــــــــــــــــ صلاح ـــــــــــــــــم)

خط احمر / للمبدعة (ريــــــــــــــــــــــ صلاح ـــــــــــــــــم)

خط احمر

...........

ما كانش لقانا مترتب

وباستعجب

بقينا ازاي ف غمضة عين

بدون تفكير كيان واحد

بقينا ازاي من المسافات

نقرّب مهما نتباعد

ومن غير حتى إي كلام

بنظرة عين بنتواعد

ويبقى لقانا أسطوري

كأن بقالنا ألفين عام

ما شوفناش بعض

بنشبه حضن موج البحر

لرمل الشط وقت المد

وتبقى معايا واشتقالك

واحس انّك واحشني بجد

وامد إيديا ع الساعه

أشد عقارب التوقيت

عشان فعلا تبطل عد

ولو يا حبيبي كنت أقدر

أوقّف ف السما نجومها

عشان الوقت ما يفوتشي

ولا يمشي القمر م الأرض

واحس بقلبي دقُّه يمد

كأن النبض بيدوّر

على طعم اللقا التاني

واحس البرد راح منّي

وحضن الحب دفاني

ويبقى الفرح عنواني

واخاف جدا ما يكملشي

عشان يا حبيبي لمّا امشي

بتيجي الغيره تسندني

وتمسك إيدي ف السكه

أخاف جدا ل جنّيه

ترش ف ودنك الضحكه

تزغلل قلبك الطيب

تقع يا حبيبي ف الشبكه

وابات شابكه الدموع ف العين

ليبقى غرامنا بعد الحين

يادوب ماضي مالوش معنى

ويبقى لُقانا خط احمر

.....................................

من ديوان

دم البراءة

ريــــــــــــــــــــــ صلاح ـــــــــــــــــم