بدون أحزان // لأميرة الإبداع ( ريــــــــــــــــ صلاح ــــــــــــــــــم )

بدون أحزان // لأميرة الإبداع ( ريــــــــــــــــ صلاح ــــــــــــــــــم )

بدون أحزان

...............

ما تدبحش الورود لمّا

عبيرها يفوح

ما تزرعش الجليد أشجار

ما تخطفش الدفا م الروح

حبيبي القلب لو مجروح

ح تلقى الدق لحن حزين

وتلقى العين ..

دموعها بتتفرد أنهار

بلاش ترميني جوّه النار

وانا الحور اللي م الجنه

حبيبي الحب له معنى

أكيد أجمل من التصوير

أكيد القلب معنى كبير

مالوش تفسير ف كُتب الناس

تعالى ارقيك من الخنّاس

واصب الكاس عسل صافي

حبيبي القلب عز البرد

بيصبح بالغرام دافي

بلاش لحظه تكون جافي

وترمي الحلم للكوابيس

ما فيش عز الضلام فوانيس

تنوّر ليلنا غير شوقنا

بلاش تسمح لشئ ولا شئ

يا روح الروح يفرّقنا

وطول ما معانا أشواقنا

نحاجي عليها م النسمه

حبيبي الدنيا مبتسمه

بلاش نقلب فرحها هموم

تعالى نعيشها يوم ورا يوم

بدون أحزان

ولا تجاعيد

نراعي بشوق بذور الشوق

عشان تطرح سنابل عيد

تعالى نزغزغ المواعيد

ومهما تكون وراها نروح

نلملم ضحكها لينا

نداري عليه ف قلب الروح

ولو يا حبيبي ما ضحكتش

ما تدبحش الورود لمّا

عبيرها يفوح

............................................

من ديوان

((دم البراءة ))

ريــــــــــــــــ صلاح ــــــــــــــــــم