. الهم...هم... بقلم ابراهيم القاضى

ةةة... الهم...هم...!ةةة

***...***

مين دا..اللى يقدر يغلبك ؟

ولا يكسر مضربك..

ولا يطفى ..ضى عينك

أو يجفف محلبك..؟

هو خاسر ..وانت لأه

هو راجع وانت سابقه!

ياللى قلبك..ملو كفك

قلب صافى وكف عاشقه..

*****

يا ربيع الحب..هدى

خلى وردك يملا..يدى

عبى كاسك بالمحبه..

حبه حبه..إسقى ولدى

من حنانها الصبح..فضى

والسواقى الخضر تحلب

والأيادى..السمر تكتب

عن هنادى..الشعر وردى

*****

يا نديم الحب حاسب...

حد تانى ف الملاعب

حد راكب ع المواكب

والمراكب والأوانى..

حد صاد فينا البلابل

والصبايا والسنابل..

والحمايم فوق حفانى...

****

يا نديم الشوق سامحنى

مش نديمك وانت محنى!

وانت راسك..رهن كاسك

طاب معاشك م التجنى..

زى ناس لم بتخبز اللمون

لم بتحرز أى جون..

فوق دماغنا..يدق هون

بالجنون..راح نغنى!

****

الكل لاعب..والملاعب 

مش بتاعنا..!

الكل ضارب..والمضارب

فوق صداغنا..!

الكل غاب..واللى غالب

حد غيرنا..

يا ضميرنا يا كاسرنا..

يا خالعنا من ودادنا

لحد فين؟

لحد فين التوهه ..ماشيه بالخطاوى

لحد فين القلب يعند..أو يقاوى..

لحد فين؟

وانت شايله..الهم..هم !

هم تل..وهم يم..

وهم قلبك..لم يهاودك

لو ندهلك مره..يام

ياما قلنا..ويما عيدنا

اللى بايع ميشتريش..

واللى شارب من وريدنا..

يبقى سيدنا..وطعم زادنا والياميش

لو لاعبنا..نتغلب..له!

لو يئن ..نبكى قبله!

وان نادى له..يوم شيطانه

هو عارف فين مكانه..

لما يرجع عن جنانه..

جوا قلبك ..ينام يمدد

ماإنتى امه..شايله همه

تجرى يمه..بقلب يسجد

تغسلى له..يامه..جسمه 

تكتبى له تانى اسمه..!

انت الوحيد....!

انت ابنى..لو غالبنى..

أموت فى غلبك..

ومن تانى ..ألاعبك

وأتغلب لك من ..جديد !!

******

الشاعر ابراهيم القاضي....2011/11/30