مش ملاك _ بقلم مبروك علوه

( مش ملاك )

أنا حاسس من البدايه

إنك مش هتكمل معايا

معدش يفرق غيابك

وبُعدك مهزنيش

ضيعت بإيدك هوايا

وحبك مبقاش منايا

خنت القلب اللي حبك

عشان قلبك محبنيش

أصلك غدار أناني

نسيت حبي في ثواني

وجريت وراء حب تاني

وياريت وياه تعيش

علي ايه جاي تعتذر

وتطلب مني السماح

أنا قلبي خلاص نساك

رجوعك ميهمنيش

جاي تطلب مني الحنان

بتقولي آسف ندمان

علي الحب اللي بعته

ولا ذكرى متتنسيش

وفر دموع عينيك

إنسى إنى أعود إليك 

خلاص مات اللي بينا

رجوع تاني مافيش

بكاك مش راح يفيد

من غيرك هعيش أكيد

أحبس الدموع في عيونك

قولها متزليش

من غدرك قلبي اتآلم

وجرحك جوايا علم

متقلبش اللي فات

أرجوك متفكرنيش

ارحل بعيد وكفايه

خُلصت حبيبي الحكايه

أنت مبقيتش ليا

وحبك ميخصنيش

دانا حبي خساره فيك

قلبي مبقاش شاريك

متترجاش عواطفي

أصل أنت مرحمتنيش

ماهو أنت مش ملاك

علشان أبقي عليك 

وهي دي النهايه

وبدونك راح أعيش

..............................

مبروك علوه