إقرأ للرائعة : إيزيس محمد غانم (( قصيدة ... جلد العتمة... من ديوان (هلع الخوف ))

قصيدة ...
جلد العتمة...
من ديوان (هلع الخوف )
ـــــــــــــــــــــــــ
والليل ... بيدوس .. !!
على خد النور ..
بحذائه الإسود ... وبيخرم 
عين الشمس بدبوس .. !!
علشان خفافيش الضلمة تعدي 
وتسكّن ....... 
في نفوس الخلق كابوس ..
ظهرت ..
من جلد العتمة عجوزه ..
في إيدها فانوس .. !!
ورا منها إثنين ... شايلين صندوق 
منحوت ... على عضمه العاج 
جعران ... وغراب ..
وحنش ... أجرب ..
على صدر الباب 
محفور ... على ديله المنحوس ..
السوس ... للسوس ..
ويشق البحر ... حصان أبنوس 
شايل على ضهره هاروت وماروت 
شايل مملكة السحر الأسود ..
شايل ... موت .. !!
وكأن إيزيس بعد ما لمت ..
أشلاء أوزوريس ..
في تابوت الفرعون الطيب ..
وإتحدت ...
بفانوسها الشمع المتحصن ..
من نار إبليس ...
إتحدت ... بالشمع وعدت ..
من جلد العتمة ... وادي الأشباح 
بتابوت أوزوريس ...
إتفاجأت .. 
بغصون القمح الدبلانة ...
والشجر المدبوح ...
النازف دم غصونه ..
سبايك غلة ... وروح .. 
روح الإنسان ...
روح الفلاح المتعري ...
الناسج ... عرقه ... هدومه 
بالفاس الباكية ... بالأرض الشاكية 
بالثورة اللى إتسرقت من إيد الطفل .. !!
الطفل اللى بدمه ...
نبّت أشجار الضل ...
بس الضل ... في عتامة خفافيش العتمة 
مبقاش ضل 
والكل .. اللى اتجمع في الواحد 
مبقاش كُل ...
ولإمتى يا مصر .... ؟! 
تينك وزتونك للأسياد .. !!
والعبد الراكع فوق طينك ... 
بنقاء الفطرة ...
بقى م الأوغاد ...
مع إن عيالك وضوكي ..
وبمية نيلك غسلوكي ..
من كل فساد ...
فإزاي يا إيزيس .. ؟!
حورس يستشهد علشانك 
ويخضّر أوراق أغصانك 
وتسيبي السوس ينخر عضمك 
في صلاة العصر ؟!
قدامك طريقين .. 
يا تعودي لصلاة الفجر ..
وتصلي الفجر ...
يا تسيبي الشياطين في مسامعك ...
تدّن فتنة ... وتسبح سحر 
فوقي يا مصر ... فوقي يا مصر .. فوقي يا مصر
§§§§§§§§§§§§§§§
#حقوق_النشر_محفوظه