الى حواء فى عيدها (بقلم) محمد ابو العبادى

الى حواء فى عيدها 

وطنك الاول

..............

انا اللي م التراب مخلوق

عشان فوق التراب ح أشقى

و ح ارسم ع التراب أحلام

وح ازرعلِك جناين ورد

تنامي فراشه وتقومي

ع العطر اللي بات ممتد

أنا الضحكه اللي لو غابت

تموتي ودنيتك تتهد

أنا الوارث من الجنّه

حنان جابهولي أوّل جد

أنا أدم

أنا العالم

أنا الحِصن اللي يحمي بجد

يا حوّا خُشّي أحضاني

ح تتدفّي ف عز البرد

بلاش تمشي ف طريق العِند

تعالي بدايتك الأولى

على شمالي يادوب ضِلعي

وحجّي ف قلبي ميت حِجّه

ولفّي ف الوريد واسعي

ولو فكّرتي ف الهجران

بنار الدنيا تتلسعي

وتتمنّي طريق عوده

لباب مفتوح على قلبي

ساعتها القلب ح يخاصمك

وذنبك يبقى مش ذنبي

يا حوّا دانتي شئ منّي

ما تنفصليش بدون أسباب

ما يشغلكيش بريق زايف

مداري ألف هم وهم

دا لو عضو ف جسد يخرج

أكيد يطلع معاه الدم

أنا الأب وحبيب وصديق

ودورك تبقي ليّا الأم

بلاش ياخدك طريق مفروش

ورود لكن نهايته الوهم

ف قلبي كنتي أوّل حلم

ف كوني أوّل التأويل

ولو غيّم علينا الليل

يادوب تبتسمي ييجي نهار

يا سر بداية الإعمار

ما تنسيش وطنك الأول

يا حوّا بين ..

ضلوع أدم

..........................................

 محمد ابو العبادى