( اكتب فى ايه عن مين ؟ ) بقلم : احمد راشد

( اكتب فى ايه عن مين ؟ )

مش عارف اكتب شعر / ليا يا ناس شهرين
وكأن عقلي اتقفل او إتقتل فى كمين
وعقلي يسرح كتير اكتب فى ايه عن مين
اكتب عن العاشقين والا عن التايهين
والا عن العاقلين والا عن المجانيين
واكتب عن الدنيا والا عن الاخره
اكتب شويه امل غرقوا فى الباخره
واكتب عن الصحبه كات احلى فى السهره
واكتب كلام يتنسي واكتب كلام يتكِسي
عن اى شيئ موجود لو حتى كات ذره
واوصف كتير فى بنات البيضه والسمرا
ودى شعرها اسود وإللى يا ناس شقرا
واتوه فى افكاري وازعل على حالي
وانسى طاب اكتب ايه والفكره تنساني
والله حاجه إتجِن
اكتب عن القسوه فى ثانيه قلبي يحن
واكتب عن الفرحه والفرحه جايه بحُزن
وانسى ايه القافيه واضحك واللاقي الوزن
واكتب كلام يجرح وانا لسه عالمسرح
اللاقيه كلام فى المُحنْ
واكتب حبيبتي يا مصر والاقيها كارهاني
واكتب كرهت امك فَتجيني بيساني
واكتب عن الانسان واكتب دا كان مِتهان
واكتب عن الشبعان واكتب دا لسه جعان
واكتب عن المرتاح واكتب عن التعبان
واكتب فى ايه عن مين عن شَبْ لسه حزين
معرفش يوم يكتب ليه مالزمن شهرين
قطعت يجى كشكول من جملة الكشاكيل
واكتب بيتين فى الشعر واشطب عشان تشكيل
وامدح يا ناس فى النيل واقطع عشان تمثيل
واغلط واقول عادى وانا عادى مش غلطان
لاني لا بهلل ولا ليا فى التهليل
شيئ مستحيل إني / ابقا بقرون وبديل
واكتب واقول حبيت واكتب واقول طبّيت
واكتب نسيت البيت والشطره والقافيه
انى لا يوم حبيت ولا حتى جيت طبّيت
كررت لا النافيه فكتبت بالعافيه
اني يا ناس عايز ودا شيئ ماهوش جايز وانا لسه مش جاهز
قدامي 100 حاجز كي يكمل المشوار
انا عيبي فى الدنيا جيت جَدّ مش بهزار
المره دى هاكتب وانسى إني شطبّت
او فى يوم شخبّطّ او فى الحِلل خبطّ
هاكتب باحساسي واكتب كلام بالظبط
واكتب عشان او عن / انا قلبي ليكم حنّ واكتب بنفس الخط
انا عارف اني بَرُط وبكرر الكلمات
معلهش دا عيبي ودى حاجه ساكنه الذات
هاكتب و سامحوني واستنو مني جديد
 فى الصفحه او عالشات

#احمد_الراشد