بحبـــــــــــــــــــــــــــــك / للرائعة : إيزيس محمد غانم

بحبك...........
عارف من إمتا بحبك؟؟
من يوم متعلم قلبى يحب وحبيتك..
من يوم مبدأت أشوف وعنيه شافوك
من يوم مبدأت أحس الحب وحسيتك..
من يوم متعلم صوتى النطق..ونطقتك...
.........بحبـــــــــــــــــــــــــــــك......
وكأن حروف الكلمه المشبوكه شبكت قلبى
ونطقتك على شط شفايفى ...
واتحرك فيا النبض يجرى ويجرى 
وكأنه بياحق منك آخر جزء عشان يبدأ
.....وبدأتــــــــــــــــــــــك......
ف خضم بحورك عديتلك...
هو انت محستش؟؟
هو انت محبتش؟؟
ورغم ده كله بدأتك..
وانا لسه يا دوب بتهجى الحرف ف مدرستى 
وصوابعى بتفتح أول صفحه ف كراستى
كنت ف فصلى ..وكنت بتكبر جوايا 
وبيكبر جوايا هواك..
واما بسافر بخيالى ..كنت بسافر وانا وياك
للبدء الأول..للأزليه..
لبداية خلقى اللى اتخلّق من ضلعك 
واتخلقت منه البشريه
تفاحتى ف حلقك ..ف رقابتك
بتعاندك وتعيد لياليا..
كل متبلع ريقك لازم ...تشعر بيا..!!
أصل البدء الأول كان لك
لكن ف إعادة تشكيلك كان قلبى مُعدك..!!
وبدأت كأنك لسه بتحبى
وكات مشّاية حبوك حبى..!!
فكبرت ف قلبى..
وف لحظة متمخضتك حب
كنت انت الحضن اللى حضنته
وفتحت كتابك عشان ابدأ..
وقفلت كتابى ..وف ماضى الذكرى ركنته..
وبدأتك وبدأت معاك..
وكأن المزج ف خطوتنا
بيّت جوانا محبتنا
وبقيت تسمعنى طول مانا سمعاك
حتى لوكنتش ويايا ولا كت معاك
ومازالت تفاحتى ف حلقك 
بتعاندك وتعيد لياليا..
كل متبلع ريقك لازم...
تشعر بيا ....تشعر بيا ...
=====================
قصيدة #التشكيل_من_خلال_إمرأه
من #ديوانى_الثانى
#إيزيس_غانم