مخمخ مخه طار ..للمبدع // بهاء الدين بدوي

مخمخ مخه طار ..للمبدع // بهاء الدين بدوي

مخمخ مخه طار ..

~*~*~*~*~*~

واحد صاحبنا هوايته

يكذب وكان فشار

ودي حاجة تجري في دمه

وماكانش فيها هزار

يحكي حكاوي عجيبة

وسيناريوهات وحوار

دمه خفيف مهضوم

وإسمه كان "مختار "

وفي يوم من الأيام

وكُنّا شباب وصغار

قاعدين على الكورنيش

ناكُل دُرة وفشـار

كانت أجازة الصيف

ومعانا كان مختار

وبدأ يمارس هوايته

في الفشر والأفكار

وحكى لنا فيلم دراما

وكأنه عايش الدور

قال إنه راح منطقة

وماكنش فيها عَمَار

وفجأة هجمت عليه

عصابة م الأشرار

وكان ياعيني لوحده

وهُمّا كانوا كتار

رفعوا عليه السلاح

واستهدفوه بالنار

رصاصة صابت دراعه

والتانية جات في الزرار

هجم عليهم وصرخ

أنا مخمخ الجباااار

وكان بإيده السليمة

يضرب عشر تنفار

وإحنا نقول له وااااو

إسترها ياستار ..

وفي سرنا كُنّا نضحك

ونقول له آه يامَعّار

....

وفجأة عَدِت علينا

بنت إسمها " أنهار "

كانت جارتنا وأبوها

بيشتغل جزار

البنت حلوة وجميلة

وكلنا في إنبهار

الوجه زي القمر

والخدود زنهـار

والوسط غصن يميل

والعود لميس دوّار

والعطر منها يفوح

ريحة عبير أزهار

وكان قاعد جنبنا

أخوها " عبْ جبـّار "

رياضي يلعب حديد

وجسمه زي التـُور

مشهور بـ "عبده مجانص "

وكنيته الجـزار

القصد مخمخ شافها

وعقله شط وطـار

عضعض ومصمص شفايفه

وقال دي مُزّة نـار

عبيط وماكانش يعرف

أخوهـا عب جبار

مَيـِّل عليه ووشوشه

ياعم إيه الأخبار !

وإيه النظام واللون

تعرفها يامختار ؟

قال له: هو هوووه من زمااان

بس دي أسـرار

قال له ياراجل إحكي

هو إحنا لسة صغار !

وإستدرجه في الكلام

ماهو أصله كان مكار

ورَد مخمخ بسرعة

ودي عادة الثرثار

قال له دي بتحبني

وإن غبت يوم تحتار

دايبة في دباديبي

والحب دا غـدار

وياما جريت ورايا

من شبرا لخزندار

ويوماتي تيجي عندنا

في بيتنا ليل ونهار

فجأة لقينا مخانص

عينه بتبرُق شـرار

وإنتفض وكأنــه

بُركان معَبـِّي نار

مسك صاحبنا وقال له:

أنا أبقا أخو أنهار

مخمخ ياعيني عليه

من رعبه كان منهار

وكل جسمه إترعش

بالظبط زي الفار

وبنطلونه مبلول

نزلت عليه أمطار

والواد مجانص يشّدُه

تعالى لي ياجَـرّار

عيني عليك يامخمخ

قفاك بقا زنهار

وفي الظروف العصيبة

الجري للشُطّار

وإحنا ننادي ونزْعَق

إرجع يا عب جباااار

وكان يشيله ويحطه

كأنه عصفور طار

وضرب من غير شتيمة

من كل نوع مقدار

يقول له إشتم نفسك

يرُد : أنا صُرصااااار

مخمخ يصيح أبوس إيدك

إعتقني ياجبااااار

أنا تبت توبة نصوح

وربنا غفاااااار

ويوميها ضربه عَلقَه

ماإنضربها حمـار

وكَسَر لُه صف سنانه

ودراعه كان مكسور

ودي آخرة اللي بيكدب

واللّي يكون فشـار

~*~*~*~*~*~*~*