وشوشت العصافير _ بقلم سليم عيسى.

وشوشت العصافير تا ما يزعجوكي

وهمست للوردات ت يعطروكي

وكمشت شوية لون بعتم الليل

تتنغندر على عيونك ويكحلوكي

وأخدت من الغيم راحة النهدات

بتتمرجح على زنودك ويمرجحوكي

وينزل شِتي الإيام هاجر الرعدات

مع شوية برد دافي تا يغمروكي

ووصَّيت الشوك مع عطر الوردات

إِن قَرَبوا من مَلمَسِك ما يجرحوكي

وإِن دِنيتْ من شَعرك فراشات

يهَدُّوا على الخصلات ويزينوكي

وإن غَبَّروا الطرقات عَ الدعسات

بنَبِّه الغبرات بحنان ما يغَبروكي

وإِن نِزلت على خدودك الدمعات

لُولُو السواقي سحر يخدخدوكي

وإِن وصلتي ع مطلع الدرجات

ووردات الدار بالهوى بيلمحوكي

بتغمرك ضلوعي مع البسمات

وجوا الجوارح فرح رح يسَكنوكي

سليم عيسى....