دايره مقفوله / للمبدعة ريم صلاح

دايره مقفوله / للمبدعة ريم صلاح

من ديوان

((دم البراءة ))

الذي فاز في النشر الآقليمي

وتحت الطباعة الآن علي نفقة الهيئة العامة لقصور الثقافة

....................................................

دايره مقفوله

...............

لأني بجد مش عارفه

ومش فاهمه

ومش لاقيه

ب احس بنفسي ف الساقيه

ب ادور مش شايفه أي طريق

و ب ادخل دايره مقفوله

و ب اشرب من بحور الضيق

ومش لاقيه ف طريقي صديق

يمد الإيد ويسحبني

لبرّه الطوق

ولا شايفه النجوم ف الليل

مافيش إلا قمر مخنوق

وانا بحلمي اللي بات مشنوق

صبحت بجد مش عارفه

وشايفاني ف طريق خايفه

من الضل اللي ف الخطوه

وصوت النسمه ف وداني

بيشبه زومة النوّه

وشايفه ف الضلام خيالات

وإيد مخالبها زي رماح

لاهي عفاريت

ولا أرواح

وانا مش خايفه م الأشباح

لكن م الناس بقيت خايفه

ولسّه بجد مش عارفه

جرالي أيه.. 

وإيه أصبح هنا حاصل

أعود م السكّه دي واللا

أكمّل تاني وأواصل

رح اخد لحظتين فاصل

وافكّر ربما أقدر

أشوفني بنظره مختلفه

ياجوز أفهم ولو حاجه

ياجوز أقدر أعود شايفه

وما انكرش ان انا خايفه

ل بعد الشوف

ولحظة ما افهم الفوله

أشوفني ف ساقيه مربوطه

ودايره ..

ف دايره مقفوله

...........................................

ريم صلاح