بيلم في الذكري // للمبدعة زينب ابو الفتوح (السويس)

بيلم في الذكري // للمبدعة زينب ابو الفتوح (السويس)

بيلم في الذكري

باطمن عليك 

وباحسب عمري بوجودك

ولو عيني ماتسلمش علي عينك 

كفايه أحس رضا روحك 

ودقة قلبك تصهل 

ولا تبطلشي 

قلبي اللي داب مني 

داير يعاتبني 

بيلم ف الذكري 

ويفز سايبني 

بيطير علي جناح الشوق 

ويدق علي بابه 

وانا لسه ....

بافوق من غدر أحبابه 

م تلومش غير طيبتك 

انت اللي ماسألتش 

عن حد ماعرفتوش 

ولا قلب ماقابلتوش 

ضحك العيون ..مغشوش 

والبسمه بس رتوش 

انت اللي سايقني 

يا قلب ما نصفنيش 

أنا عمري ماتعبتك 

ولا روحك اتجرحت 

ولا شوفتني هايمه 

ف خيال ولا زورتوش 

يعني تلوم نفسك 

يا قلب بقي مجنون 

سيبت السنين تجري 

وجاي تعيشلي شجون ؟!!

وتحب وتخبط ...

ع الروح وتتنطط

كان كله دا بدري 

إيه فكرك بالشوق ؟!!!

إيه وصلك دربه؟ 

وانا عمري بحاجي عليك 

خايفه تزور كهفه 

وتشت مني بعيد 

يهرب أمان روحي 

وتقيد نيران السهد 

اهدي بقي وارجع 

طفي نيران شوقك 

واسرج في روحك ضي 

عمر الهوي ما يبلغك فرحه 

طبع الغرام اتبني 

علي الجراح والبعد

زينب ابو الفتوح / 4/ 5/ 2015 / السويس