قصيدة / نقطة تفتيش _ لـــ عمرو المصرى

قصيدة / نقطة تفتيش ... لم تنشر من قبل ..كاملة
////////////////////////////////////////////////////////

ولأن عنيكي يا مولاتي ..
جواز السفر المستخرج
من قسم الشرطة التابع ..
مديرية أمن العشاق
ومدون في سجلات الروح ..
إني مسافر لحدودك
وماكنتش هاعرف إني ..
هايتم القبض عليّ لمّا اوصل لك
مع إني بحبك
وف حبُك ..
إتعلمت فنون الشِعر
وعرفني الشِعر
وفطمت القلب عليكي
واتعلمت ازاي أتنازل ..
عن عِزة نفسي معاكي ..
ومش خجلان
وعرفت كمان ..
إن تاريخ البشر الممتد – بجد –
بيبدأ من حد عينيكي
وان السبب الأوحد لوقوف النيل ..
لما مشينا على الكورنيش ..
إنك بصيتي على الكورنيش ..
إنك بصيتي عليه
فاحترمك جدًا
حتى الموج الهادي ..
اصطف على الشطين
وبيعزف أنغامه نشيدنا الوطني
وان نزول المطر الزايد في ( مطروح )..
في اليوم التاني من مؤتمر الأدباء
علشان برضه كنتي هناك
فاتسجل إنه العيد القومي الإستسنائي
وعرفت اقراكي وبالتشكيل
في كل لغات العشق ال مش مكتوبة
وان القناديل اللي بيحدفها الموج ع الشط ..
بتنور لمّا تشوفك
إتعلمت أعيد تكويني وتشكيلي الجغرافي
واشطب كل التفاصيل ال مش مرغوبة
- كلمة ف سرك .. -
- اتعودت أكون اللعبة اللي بتكسرها إيديكي
ومش ندمان –
واتعودت حضور الندوات الثقافية ..
وشرب الشاي ع القهوة
واتجرأت وحطيت صورتك خلفية
على وشِ موبايلي ..
ومش محتاج لعينيّا اشوفك بيهم
ولا لإيديا تضمك
ما انتي كسوة جسمي
وبفرح لمّا حروفك تسبق اسمي
واتباهى بإني عرِفتك
عرفوني الناس
بإنك مصدر كل قصايدي الموجودة
واللي ف علم الغيب
عرفوني بإني باحبك
واكتر واحد بيحبك على وِش الأرض
ولأنك مرسومة على جسمي خريطة
ومحيطة بكل اليابس والاخضر
وبحور الشِّعر
وكإن الشمس قصيدة اتكتبت وبنت حويطة
مش عايزة تغيب عن وشِك أبدًا
بتغازل موج البحر
وتنزل تغطس تغسل ضفايرها
ونن عينيها
علشان لما هاتطلع تاني ..
هاتشوفك أجمل
وعروقي زي خطوط الطول والعرض
وبفرض بإني عشقتِك
ومخبي القلب عشق عشانِك
- بيعاني الموت -
خبيته ف شنطة عمري
وعمري ما كنت مخالف ..
لقانون العشق المسموح
بيتم القبض عليّ !!
والله ما كنت مصدق أني هُنت عليكي
وقفلتي حدودك من جوايا
ورميتي السلك الشايك ..
بيني وبينك ..
وانا بيني وبينك ..
بلعن خوفك اللي هزمني
ومنعني من إني اشوفك
وكإني متبلغ عنّي
من حرس البرج الواقف فوق أسوارك
والقلب النازف عشق عشانِك ..
بعد ما كان بيعاني الموت ..
اتنفخت فيه الروح
وف أول نقطة تفتيش ..
اتصادر مني .