بنت بنوت _ بقلم ريم صلاح

بنت بنوت

............

القلب كهف جميل

يشبه لبنت بنوت

لحظة ما يسمع صوت

تلقى الخدود جُمّار

والحب كون مربوط

ف ستاير الأسرار

لو خش قلب النار

يبقى الجحيم جنّه

وان خش جوّه طابور

يبقى الإمام ف الصف

والكل يستنّى

حتى التراب ع الأرض

لو قلبه حب بجد

يصبح تراب حنّه

والدنيا تتغنّى

من بعد عمر سكون

والبنت عطر لمون

كان قلبها المجنون

زي النهار صابح

كان كل يوم أحلام

تخطفها للي جي

ما تقفش ف امبارح

بس النصيب جارح

داس قلبها المشمش

أوّل ما رمش العين

عند الغرام يرمش

البنت كانت نور

جاله الضلام عشش

لحظة ما دق القلب

حسّت بطعم الحب

بس انقلب لمرار

البنت جنّه اتكتب

تدخل ف قلب النار

قلب الولد غدّار

باعها ف نهار الشوق

داق العسل أنواع

والمُر هيّ تدوق

بات حلمها المسروق

مدبوح على الأسفلت

قلب البنيّه اتهد

من قسوة المكتوب

العيب ماهوش ف الهوى

العيب ف مين محبوب

مش كل عاشق صدق

ولا كل عشق حلال

ولا كل مؤمن نجا

من قبضة الزلزال

يا دمعة الموّال

قومي اعزفي الأنغام

على حلم مات مقتول

وغرام ما كانش غرام

على غول كابوس ابتدا

ينهش بدن أحلام

يا أهة الأيام

زيدي ف قلوبنا الصوت

وابني الضريح ف الروح

والنبض يبقى تابوت

دا الحلم بات مدبوح

والدم ..

بنت بنوت

.......................................

ريم صلاح