موتيات_ رائعة بقلم الراحل عصام نبيل

-الله يرحمه

موتيات
(كتبت في العام 2013)
(إلى خالد.. أربعون عامًا من عمري.. وابن أمي وأبي والموت)

(1)

كلمتين
تلاته
ولا موسوعة كلام
كله في الآخر يعدِّي
كله في الآخر يؤدي
لإن زينب
هيَّ ساندي
وبعد لحظه أو شهور
حـ امشي وحـ افوت لك سكاتي
وابقى اقرا لي السلام
ولاَّ اقول لك
اوعى تكدب
دا انت ياما حلمت بيها
لحظه فيها
اغيب سكوت
لحظه تشبه المنفى
وطعم الموت
كنت مستعجل قوي لـ زيارته الآخيره
وعاوز تجيبه لحد حدي
في الفجر تغزل في خيش الأرض قدِّي
وفي المسا بتحفرلي لَحْدي
وتسمِّي ساعة الموت غرام
.....................
..........................

(2)

أنا أصلي باشوف في العتمه الموت
والنور الفاجر
يتأخَّر
واما بيرجع
بياخدني بعلو الصوت
في العتمه بالاقي
كل الجدران بتضيق
والروح بتدَّور على فرصه تفوت
والنوم موته
والصحيان
مش دايما يبقى حياه
ولا كل ساعات الموته سكوت
ولا من طلعت روحه
مات

(3)

آه بكيت
بس من غير ماتشوفوني
مش أنا الخجلان
اللي بتخجل من بكايا الروح
والروح لسه بتطُّل فـ عيوني
لسه بتشاور عليكم
وانتوا لسه زي ما انتم
العما أصبح إرادي
والطرش في حياتكوا عادي
والخرس
زوِّد ظنوني
ماتخافوش انا ماشي ماشي
واوعوا مره يعدِّي عيد
تبقوا بالرحمه تزوروني

(4)

ما اقدرش أخبِّي
إن الليله كنت باخرّف
زي المحموم
ولا إن الشوك
نبِّت على ضهري المحني
فـ يوم
وان العمر بحاله
عدَّى عليَّ
يا دوب في ساعات
وان العصفور الأخضر
اللي مع طلوع الفجر يغنِّي لي
بص لي من ساعه
ومات
ومش فاضل إلا ثواني
واكتب على باب البيت
كلمة فات

(5)

كله في حياتك.. ترف
يعني ماتعملوش
والزحام......
دوشه ووشوش
يبقى انت قلب وعين
يشتهوا حبِّة حاجات
بس برضو مايلاقوش
كل شيء يحرم عليك
واللي بعيونك تشوفه
زي غيره مابتعيشوش
يعني عمرك كله فُرْجه
وامَّا يجي الدور وتمشي
يجي اللي حـ ينضَّف مكانك
يرمي اللي باقي من حاجاتك
الورق أصفر قديم
يعني عود كبريت ونخلص
والكتب مالهاشي عوزه
والجِزّم تاخد مكانها
حتى صورتك القديمه
تبقى في عقول اللي عاشوا جوا منك
لحوَسَه وحبِّة رتوش
يعني تتنيل بنيله
واوعى تبكي زرعه بارت
ولاَّ عمر ماعِشتهوش

(4)

هوَّ نفس البيت
والحيطه اللي مايله
والسكه اللي قطر بضاعه بيعفَّر عليها
وهي نفس البت اللي بتعدي على الشجره العتيقه
جايه مـ الحواديت بتتباهي بضفيره
هوَّ نفس الواد اللي بيشمَّر كمامه
كل ما البنت بتلمحه
وتحدف ضفيرتها لورا
هيَّ نفس البلد اللي فيها السلطه بتحرَّم الحواديت
وبتكتف الاولاد
وتقول للتخين فيهم
ازعق وصرَّخ
وانده الماشيين
بس قول "انا مّرّه"
هي نفس السلطه اللي بتشد البت مـ الضفيره
وتغتصب فيها الحلم
والحدوته
وست عجوزه طلت فجأه مـ المندره
وشيخ بليد
بيسبح للولي
وبيفتري بمسخره
أعوذ بالله من شر ما أرى
أعوذ بالله مـ العهر والخفافيش
والقهر
وابن المّرّه

(5)

انت ليه ما زورتنيش
مش عدَّى عيد
ورا عيد
وانا لوحدي مستني؟
عاوز اتطَّهر واغيَّر
واتمنى تدلني فين راحت ملامحي
الليله ليلة العيد
ارفع عن الشاهد غبار
وريحة بعاد
وجيب لي زهر وريحان
وبخور
وكفن طاهر
جديد
زورني
ولو مش باقي غير عضمي
ولو رمَّه
ولو شافني الصحاب غمَّه
زورني
كما الشمس لمَّا تزور الغيطان
من بعد ليل كالح
وزي الأيد
لمَّا تحضن في الفراغ ميت
وروحه قضِّت سنين
وما عرفت تدخل في يوم دنيا
ولا عرفت في يوم العيد

(6)

جاي لك تحضني
اطلع من ماتخافش انا محتاج لك
علمني
لو عاجبك ضيق القبر اسكنِّي
لو أدمنت خبيز الجنه
يبقي اتكلم
افشي السر وعرفني
مين وياك؟
أنا جيت
وقريت
وبكيت
وحكيت
وسقيت
وانا جاي لك عديت على غفر الناحيه
وزكيت
أنا عاوز أبقى معاك
ما انت اللي مشيت
وانا لسه ماقلتش كل كلامي
سهتني وانا باعمل قهوتك المظبوطه
سيبتني للطل وخدت معاك البيت
عارف
كل ما باقرا عليك الفاتحه
بالقاك انت بتقرا عليا
وبتدعيلي
وبتزرع شجرة سما على إسمي
عارف
ياسر جاب لي القهوه في فنجانك
وجاب ولعتك لما لقاني بادور في جيوبي
وقال لي يا عمي ديه من بابا
يوسف بيقول لي يا عمي باشوفك بابا
عارف
لما بافكر فيك يا حبيبي
باعرف انك كنت حقيقي
أخ حقيقي
وان انا رغم العمر الفارق بننا
كنت صغير وانت كبير
عارف
ماعرفتش إلا فـ بُعدك
إني اتعلمت كتير على حسك
حتى ازاي اتفرج عـ السيما
وازاي على ونَّاسة سهره فـ بيتنا
أخلط حواديت الليل بالقهوه
..............
حتى القهوه
لسه بتحكي عليك للعود
حتى العود
لسه بيغزل لك مزيكا
وبينسج لك نور وحرير
عارف
انا هاقضي معاك الليل
حـ اعمل قهوه وحـ ارجع لك
نشربها واتمدد جنبك
حـ احكي لك واسمع لك
لحظه يا خالد
مش حـ اتأخر

الشاعر / عصام نبيل
الله يرحمه
........................

-