إنتبه لكلامي يا ابني _ شعر بقلم ريم صلاح

إنتبه لكلامي يا ابني
........................
اللي عدّى البحر .. إبني
واللي جاب النصر .. إبني
واللي دمُّه ف سينا طارح
ألف شجرة صبر .. إبني
واللي شق الليل وجابلي
شقشقات الفجر .. إبني
والتاريخ ما وقفش يا ابني
عند أكتوبر ونام
التاريخ تعظيم سلام
للي يزرع
واللي يصنع
واللي يبني
واللي ما يرفعش رايتي
فوق جبين الشمس عاليه
عمره لحظه ما يبقى إبني
إنتبه لكلامي يابني
كام سنه ف مُر انكساري
حالتي كانت ف الحضيض
الكلاب تنهش ف لحمي
والجراح تنزف صديد
إنما رغم الهزيمه
العزيمه من حديد
قام ولادي ف لحظه عبروا
فوق جهنم حمرا مرّوا
جابوا توب النصر ستروا
بالرايات العاليه بدني
إنتبه لكلامي يا ابني
كنت عايشه الذل شايفه
الشماته ف كل عين
كنت شاربه المُر ساكته
كنت قاعده بين نارين
نار بطعم النكسه مُرّه
نار بعين الشمتانين
كنت اجوع وف قلبي جرح
كنت اغمّس عيش بملح
رغم إنّي كنت طرح
خيرُه للناس أجمعين
يومها حسّيتني وكأني
زي غول عدّى ودبحني
إنتبه لكلامي يا ابني
لمّا صوت النصر أدّن
ف العبور الله أكبر
والخطاب يوم سته جلجل
صوت جميل من إبني لسمر
يومها حسّيت بالكرامه
جاتلي تاني بعد غيبه
الدفا بسينا الحبيبه
كان بقاله سنين ناقصني
إنتبه لكلامي يا ابني
إوعى تركن ع اللي عدّى
تهزم النصر بإيديك
لو ح تركن ف الزمن ده
الجميع ح يدوس عليك
رح تنام ع الأرض عاجز
والكلاب يتسلّوا بيك
إوعى موتي يكون بإيدك
إوعى يوم تغفل عينيك
بُص دايما يم بُكره
إبني عقل جديد وفكره
خلّي أرض الصحرا خضرا
وافتح الأحضان وخدني
إنتبه .. لكلامي يا ابني
..................................

من ديوان

ياريت اقدر

ريــــــــــــــــ صلاح ــــــــــــــــم