ياليل (بقلم) احمد أمين

ياليل (بقلم) احمد أمين

ياليل

طال السهر وياك

والكل فيك شاعر

يوماتي يستنناك

مليان بمشاعر

فيك من يناجي حبيبه

ومين بيتألم

ولاحد غيرك داري به

من غير مايتكلم

واللي مابين الكاس

غرقان في أحواله

مش همه كل الناس

ولا إيه هيجراله

فيك اللي بيناجي ربه

عايش على عبادة

دايب ومن كتر ذنبه

بكاه بقى عادة

فيك اللي مستني ولده

يمكن يجيه ندمان

ينهي معاه بُعده

ويحسسه بأمان

واللي سعيد فرحان

وعياله حوالينه

من كتر الاطمئنان

الكل حاسدينه

فيك اللي ناسي أخوه

عايش بعيد عنه

كأنه مش ابن ابوه

ولا كان في يوم منه

وفيك كمان الحبايب

بيسرقوا ثواني

يحيوا الفؤاد اللي دايب

ويعيشوا من تاني

واللي يخبي ضميره

ويصاحب الشيطان

يروح وياكل في غيره

وكأنه مش إنسان

فيك الفرح والهنا

فيك الدموع أشكال

فيك الجوى والضنى

وحلاوة الموال

كتير كتير فيك صور

معدولة ومقلوبة

القلب منها انفطر

ومفيش غير التوبة
.................
احمد أمين