الدم بقى ميه // احمد صبري

الدم بقى ميه
احمد صبري
-
الدم بقى ميه
والميه مقطوعة
الفاتحة ع الحنية
والرحمة ممنوعة
قالوا اْهلك يا تهلك
بقوا اْهلك يهلكوك
تخيل مين يهدك
اْمك او اْبوك
اخوك يستغنى عنك
وينسى حتى اسمك
وكل عيبك إنك
فاكرهم بيحبوك
-
بشر مايبشروش
إلا ب شر النفوس
عميوا مابيشوفوش
إلا مكان الفلوس
سمعنا ف الحواديت
عفريت جوه الفانوس
طلع البشر عفاريت
طلع الجدع منحوس
-
ياللي معاك تشتري
قرب وخد حقك
زمن المحبة جري
لما الزمان دقك
كله بيغدر يخون
حكم بقى عقلك
حاسب حسن الظنون
والطيبة من قلبك
-
خلي عقلك براسك
ونام فاتح عينيك
واللي شايفهم ناسك
ممكن يدوسوا عليك
اسمع كلام مجرب
الطبيب هيجرح فيك
قابل ولا تستغرب
غدر اقرب ماليك
-
الدم بقى
ميه
والدنيا دي
غابة
صدق اللي قال
فانية
والبطن
قلابة