كبرت يا شاعر _ بقلم سليمان خطاب
السلام عليكم ورحمة الله تعالى وبركاته
كبرت يا شاعر
----------------------
كبرت يا شاعر
وللَّا القلم ضهره انحنى
فوق الورق
وللَّا الكلام من كتر همك
جوَّا قصايدك
اتشنق
وللَّا المعانى اللى ف خيالك
صابها طوفان
الغرق
وللّا حلمك اللى ملامحه
من خجل البنات
اتسرق
وللَّا اتحرق
وللَّا اندلق عل وشك
فصل الخريف
وللَّا شمسك لسه خايفه
م الرصيف
نومك خفيف
وللَّا ليلك لساه نحيف
وللَّا كبرت ياشاعر
والمشاعر
ما عادش ليها
أي طيف
نسخ الرابط | |
نسخ للمواقع |