المرايه / للمبدعة زينب أبوالفتوح (السويس)

المرايه / للمبدعة زينب أبوالفتوح (السويس)

المرايه

بتكدِبى ..

و تعلقينى ف الفضا

و تشكلينى نور و نار

الشيش موارب دفته

أمواج سحاب بتطلَّعينى

أنفُخ نايات العشق أدوووب

و مَرَّه واحده توقفينى

عتبة بيتنا بتكسر حلمى

و شارعنا الضيق بيوشوشنى

بلاش تكسير

كعبِك حالل مسامير ضهرى

مُهرَه بتجرى ف سبق الخيل

لكن كل ما اطول الخط لآخره

يهرب تحت الأرض و يجرى

أرجع ليكى تشدِّى عيونى

جوا إزازِك ..

خُصله ف شعرى ..

بتحلم بالحريه

من حُضن إزاز

من بنس الشعر

من أستك شادد عقلى

من عين بترقُب جوا منى

بتعرى خوفى .. بتشيل شرودى

بتعَدِّى فيّا عَليّا

ترسم لى ماسك

يسحب ف ضلّى

يقتلنى بره الجاذبيه

أرجع لوحدى

مكشوفه للعين اللى جوايا

و لخُرم الإبره .. 

لما بَزَوّق حرف فستانى

زينب أبو الفتوح / السويس