تــــــــرنــــيـــمـــــات إبــــداعــيـة ؛ (ضلمة غناوي ) بقلم الكاتب القدير / عبدالمجيد الديّهي ؛

.

.

تــــــــرنــــيـــمـــــات إبــــداعــيـة ؛

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

.

بقلم الكاتب / عبدالمجيد الديّهي ؛

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

.

.

ضلمة غناوي ؛

,,,,,,,,,,,,,,,,,,,,,,,,, 

.

.

لَحْمَة ولُحْمَة

وفرخة وكفته

ونكته مُسخة

لطفلة ماسحة 

دموع عنيها

نفسها رمياها

علي ورك فرخة

تمصمص مخ عظامه

والعين بصيرة والإيد قصيرة

والأب تايه فِ الحواري

وحكومتنا الرشيدة

وزير تموينها ساكن فِ العلالي

فندق سبع نجوم وجناح رومي 

واخد هدومي مخالفة طريق

أصله جناح طويل عريض

النوم فيه بالمليون

واللطافة فِ الكنافة

والقطايف فِ الطواجن

غرقانة عسل وشربات وسكر

والزيت خلاص بقي فِ الصفايح

ولاحد رايح ولا حد شايف

والكل ساكن فِ القزايز

بخروه وحياة أبوه دلعوه

وزيتوه وشحموه ولعبوه ع الشناكل

دا الراتب سجاجيد مراتب

والراكب معاند وحاطط وشاطط

ودي وصفة طبيب معالج

قال لازم يسكن وزيرنا فِ العلالي

ترياق مداوي غاوي وناوي يفطس 

شعب مصر م الضحك ع القهاوي

والروشته فالحة وحروفها ناجحة

والجلالة واخدة الغلابة عمالين

يقولوا القطار محدش يطوله

وإن وقف يصرخ بصوته ع الربابة

لايهمه واطي ولايهمه عالي 

ولاحد داري ولا حد عارف 

سر أسرارطلاسم حياته

بيقولوا عنه مارد كبير 

عايش طول عمره في قمم دقيق

وقوانين حياته زغزغة حديد

وكلابشات بنطلونه نسر جارح

ماسك شعار البطانية من برة برة

وسكاكين خلاصه كرسي فاضي

أمريكاني علي علماني غربي تاني

محني كعب رجله بحنة إيطالي

ومكحل جفن عينه بكحل أصفهاني

ماهوش وزير مصري دا وزير براني

راضع لبن أصلي من صدر أم أمريكاني

إبليس فِ التدليس دبس النواب فِ المكتب

وخرج م المجلس رافع راية شعاره

إستقالة تفوت ولاحد يموت

والعاقل يضرب دماغه فِ أتخن حيط

دكاكين ديكور عايشة بالدور

بتلف علي الرولمان بلي

وباقي من الزمن ساعة

وأنا خايف والله م الولاعة

تحرق أحلام عمري

ماهي ضلمة غناوي ولاحد ناوي

يذبح الحمار الحصاوي

إللي أكل قوت ولادي

وعمال يبرطع ع الطريق

بلدنا سراير عيانين

كله نايم كله خايف

من غضب العميل

وأنا سمعت والله أعلم

إن الرئيس هو إللي أمر

بالقبض علي سيادة الوزير

خطوة جريئة أكيد حقيقة

وأنا خايف تكون مكيدة للزعيم

نقول نقيب نقول عميد نقول وزير

هوه في نظر القانون زيه زي الغفير

والله الأرانب شخرمت الفلاحين

والساقية دايرة علي أرض فاضية

والميه نازلة في سكة تايهة عن المفيد

حسبنا الله ونعم الوكيل

.

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

.

بقلم الكاتب / عبدالمجيد الديّهي

من ديوان ( وشوشة الودع )

.

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

.

.