وشبابيك من ريحة البحر_الشاعر : سليمان صالح أحمد

وشبابيك من ريحة البحر_الشاعر : سليمان صالح أحمد 

وشبابيك من ريحة البحر
====================
سنين وانا قاعد أحوِّش فى مشاعرى
وبحاول ابنيلك من وجدانى
بيت على شط الترعه
اللى عيونها سواقى
وشبابيك من ريحة البحر
وحيطان تصحا
وتصلى الفجر
وليلاتى واقف على بابك
بحدف جوَّا الأوضه
اللى معشراكِى
ورده بشرايط فَضِى
تحكيلك عن شوقى وحبى
وان تعبت تنعس ع الشعر
وأنا لسه يا حبيبتى بحاول
اغزلك م السما خلخال
على صوته
بترقص كام نجمة
والخطوه بتطرح موال
منديلى الأبيض متوضِى
على طرف الشال
والشال متعطر من ريحتك
والنسمة دلال
تجرى وتتشاقَى على جبينك
وف ضل ضفايرك وحنينك
تفرش وتنام
وأنا لسه بحاول وبحاول
ومشوارى طويل
وبلم الصبر من السكه
وبحايله يصبر ويميل
يا حب العمر وأحلامه
أنا صابر
والصبر جميل
==============================
كلمات الشاعر : سليمان صالح أحمد( سليمان خطاب)